ইৰাণৰ বিদ্যুৎ কেন্দ্ৰত আক্ৰমণৰ (Iran War) সকীয়নি দিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। তেওঁ ইৰাণক ৪৮ ঘণ্টাৰ সময় দিছে হৰমুজ প্ৰণালী মুকলি কৰিবলৈ।
তেওঁ কয় যে যদি এই সময়ৰ ভিতৰত হৰমুজত মালবাহী জাহাজৰ গতি স্বাভাৱিক নহয় তেন্তে আমেৰিকান বাহিনীয়ে ইৰাণৰ বিদ্যুৎ কেন্দ্ৰ ধ্বংস কৰিব। কিন্তু বিশেষজ্ঞসকলৰ মতে বিদ্যুৎ কেন্দ্ৰক আক্ৰমণ কৰিলে হিতে বিপৰীত হ’ব পাৰে। ট্ৰাম্পৰ এই পদক্ষেপ গ্ৰহণে কমেও চাৰিখন উপসাগৰীয় দেশ বৃহৎ বিপদৰ সন্মুখীন হ’ব পাৰে।
ট্ৰাম্পে ৪৮ ঘণ্টাৰ সময়সীমা নিৰ্ধাৰণ কৰাৰ পিছত ইৰাণেও ওলোটাই সতৰ্কবাণী জাৰি কৰে। তেওঁলোকে কয় যে যদি তেওঁলোকৰ বিদ্যুৎ কেন্দ্ৰত আক্ৰমণ কৰা হয় তেন্তে তেওঁলোকে পশ্চিম এছিয়াত অৱস্থিত আমেৰিকাৰ সকলো বিদ্যুৎ আন্তঃগাঁথনি, আই টি কেন্দ্ৰ আৰু পানী বিশুদ্ধকৰণ কেন্দ্ৰকো লক্ষ্য কৰি ল’ব।
ইৰাণৰ সামৰিক মুখপাত্ৰ ইব্ৰাহিম জোলফাঘৰীৰ এই সতৰ্কবাণীৰ পিছত উপসাগৰীয় দেশসমূহে লোকচানৰ হিচাপ কৰি আছে। অঞ্চলটোৰ বহু লোক শক্তি আৰু পানী বিশুদ্ধকৰণ কেন্দ্ৰৰ ওপৰত নিৰ্ভৰশীল। সেই সেৱাসমূহ বিঘ্নিত হ’লে জনজীৱন ব্যাহত হ’ব পাৰে। উপসাগৰীয় অঞ্চললৈ ই দুৰ্যোগ কঢ়িয়াই আনিব।
এইটো সঁচা যে আমেৰিকাই যদি কোনো বিদ্যুৎ কেন্দ্ৰত আক্ৰমণ কৰে তেন্তে ইৰাণৰ লোকচান হ’ব। অৱশ্যে ইৰাণৰ উপসাগৰীয় চুবুৰীয়া দেশসমূহে ইয়াৰ তুলনাত পাঁচগুণ বেছি বিদ্যুৎ ব্যৱহাৰ কৰে।
বিদ্যুতৰ ফলত মৰুভূমি অঞ্চলসমূহ বসবাসযোগ্য কৰি তুলিছে। সেই আটাইকেইখন দেশৰ মানুহে বিদ্যুতৰ জৰিয়তে খোৱাপানী পায়। পানী বিশুদ্ধকৰণ উদ্যোগত সাগৰৰ পানী লৱণমুক্ত কৰা হয়। বাহৰেইন আৰু কাটাৰত ১০০ শতাংশ খোৱাপানী এই পদ্ধতিৰ পৰাই আহে।
তদুপৰি সংযুক্ত আৰব আমিৰশ্বাহীৰ ৮০ শতাংশ খোৱাপানীৰ প্রয়োজন আৰু ছৌদি আৰবৰ ৫০ শতাংশ পানীৰ প্রয়োজন এই পদ্ধতিৰ জৰিয়তে পূৰণ কৰা হয়৷ বিদ্যুৎ অবিহনে পানী বিশুদ্ধকৰণ প্লাণ্টৰ কাম নহ’ব। যদি আমেৰিকাই ইৰাণৰ বিদ্যুৎ কেন্দ্ৰক লক্ষ্য কৰি লয় তেন্তে এই সকলোবোৰ দেশৰ বিষয়াসকলে বিশ্বাস কৰে যে ইৰাণে প্ৰতিশোধ ল’বলৈ বেছি সময় নালাগিব।
ইৰাণৰ সংসদৰ অধ্যক্ষ মহম্মদ বাকৰ কালিবাফে এই আক্ৰমণৰ সুৰক আৰু এখোজ আগুৱাই লৈ গৈছে আৰু দাবী কৰিছে যে তেওঁলোকে পশ্চিম এছিয়াৰ বিদ্যুৎ কেন্দ্ৰসমূহ এনেদৰে ধ্বংস কৰিব যে সেইবোৰ পুনৰ নিৰ্মাণ কৰিব নোৱাৰিব। তদুপৰি ইৰাণৰ ৰিভল্যুচনেৰী গাৰ্ডে ট্ৰাম্পৰ এই সতৰ্কবাণী কাৰ্যকৰী হ’লে হৰমুজ প্ৰণালী সম্পূৰ্ণৰূপে বন্ধ হৈ যাব বুলিও প্ৰকাশ কৰিছে।
বিশেষজ্ঞসকলৰ মতে ট্ৰাম্পে এক চিন্তাশীল পদক্ষেপ লোৱা উচিত। পশ্চিম এছিয়াৰ এক বিশাল অংশৰ নিৰাপত্তা, লাখ লাখ মানুহৰ ভৱিষ্যত ইয়াৰ সৈতে জড়িত।
