ইৰাণে (Iran) ছৌদি আৰৱ (Saudi Arabia)ৰ প্ৰিন্স চুলতান বায়ু সেনা ঘাটি (Prince Sultan Air Base)ত কেইবাটাও ক্ষেপণাস্ত্ৰ আক্ৰমণ (Missile Attack) আৰম্ভ কৰিছে। ৱাল ষ্ট্ৰীট জাৰ্নেলে দুজন প্ৰশাসনিক বিষয়াৰ উদ্ধৃতি দি কয় যে শুকুৰবাৰৰ আক্ৰমণত আমেৰিকা যুক্তৰাষ্ট্ৰৰ বায়ু সেনাৰ পাঁচখন বিমান ধ্বংস হয়। এই বিমানবোৰ যুঁজাৰু বিমানৰ মাজ-আকাশত ইন্ধন ভৰোৱাৰ বাবে ব্যৱহাৰ কৰা হয়। ইৰাণে কয় যে পাঁচখন বিমান গুলীয়াই ভূপতিত কৰা হয়। অৱশ্যে এই আক্ৰমণত কোনো লোক আহত হোৱা নাই। আক্ৰমণৰ আগতে আমেৰিকা যুক্তৰাষ্ট্ৰৰ সামৰিক কেচি-১৩৫ ইৰাকৰ মাটিত দুৰ্ঘটনাগ্ৰস্ত হৈছিল।
আমেৰিকা যুক্তৰাষ্ট্ৰৰ সামৰিক বাহিনীয়ে কয় যে ঘটনাটোত ছজন ক্ৰু সদস্য নিহত হৈছে। আমেৰিকাৰ সামৰিক বিমানখন পশ্চিম ইৰাকত দুৰ্ঘটনাগ্ৰস্ত হৈছিল। ইৰান সমৰ্থিত সন্ত্ৰাসবাদী গোট ইছলামিক ৰেজিষ্টেন্স ইন ইৰাকে এক বিবৃতি জাৰি কৰি দাবী কৰিছে যে আমেৰিকাৰ বিমানখন গুলীয়াই ভূপতিত কৰা হৈছে। বিবৃতি জাৰি কৰাৰ কেইঘণ্টামানৰ ভিতৰত, ইউএছ চেণ্ট্ৰেল কমাণ্ডে প্ৰত্যুত্তৰ দিছিল যে কোনেও বিমানখন গুলীয়াই ভূপাতিত কৰা নাই। বিমানখন দুৰ্ঘটনাগ্ৰস্ত হয়।
আমেৰিকা যুক্তৰাষ্ট্ৰই কয় যে দুয়োখন বিমানে অপাৰেচন এপিক ফিউৰীৰ বাবে ইৰাকৰ আকাশসীমা ব্যৱহাৰ কৰিছিল। এখন বিমান সুৰক্ষিতভাৱে অৱতৰণ কৰিছিল, কিন্তু কেচি-১৩৫ টেংকাৰখন দুৰ্ঘটনাগ্ৰস্ত হৈছিল। এই ঘটনাৰ পিছতে আন্তৰ্জাতিক সমাজত এক চাঞ্চল্যৰ সৃষ্টি হৈছিল। পেণ্টাগনৰ মুৰব্বী পিট হেগছেথে কয় যে আমেৰিকা যুক্তৰাষ্ট্ৰই ইৰাণৰ বিৰুদ্ধে অভিযান অব্যাহত ৰাখিব। আমেৰিকা যুক্তৰাষ্ট্ৰই ইৰাণৰ বিৰুদ্ধে অভিযান চলাবলৈ পশ্চিম এছিয়াত বৃহৎ সংখ্যক সামৰিক বিমান মোতায়েন কৰিছে। যুঁজাৰু বিমানৰ উপৰিও, কেচি-১৩৫ৰ দৰে ইন্ধন ভৰোৱা বিমানবোৰো মাজ-আকাশত ইন্ধন ভৰোৱাৰ বাবে মোতায়েন কৰা হৈছে।
বয়িঙে ১৯৫০ আৰু ১৯৬০ ৰ দশকত বিমানখন নিৰ্মাণ কৰিছিল। এই বিমানখনক আমেৰিকা যুক্তৰাষ্ট্ৰৰ বায়ু সেনাৰ ‘মেৰুদণ্ড’ বুলিও কোৱা হয়। বোয়িঙে এই বিমানখন নিৰ্মাণ কৰিছিল এই ধাৰণাৰে যে যদি মিছনৰ সময়ত যুঁজাৰু বিমানত ইন্ধন ভৰাব লগা হয় তেনেহ’লে অৱতৰণ নকৰাকৈ মাজ আকাশত কেনেদৰে ইন্ধন ভৰাব পাৰি। যুঁজাৰু বিমানৰ উপৰিও, এই বিমানবোৰ উপসাগৰীয় অঞ্চলৰ আমেৰিকা যুক্তৰাষ্ট্ৰৰ বায়ুসেনা ঘাটিতো মোতায়েন কৰা হৈছে। আমেৰিকা যুক্তৰাষ্ট্ৰই পাঁচখন সামৰিক বিমান ভূপতিত কৰাৰ বিষয়ে মন্তব্যৰ বাবে কৰা অনুৰোধৰ সঁহাৰি দিয়া নাছিল।
