ৰিলায়েন্স গ্ৰুপৰ অধ্যক্ষ অনিল আম্বানীৰ (Anil Ambani) পত্নীলৈ নতুনকৈ চমন প্ৰেৰণ কৰিবলৈ ওলাইছে বলবৎকাৰী সঞ্চালকালয়ে। সোমবাৰে ৪০ হাজাৰ কোটি টকাৰ দুৰ্নীতিৰ গোচৰত টিনা আম্বানীক ইডিৰ কাৰ্যালয়লৈ মতা হৈছে। কিন্তু উপস্থিত হোৱাৰ পৰা বিৰত আছে প্ৰাক্তন অভিনেত্ৰীগৰাকীয়ে। ইডিৰ সূত্ৰ অনুসৰি, তদন্তৰ স্বাৰ্থত শীঘ্ৰে তেওঁক মাতি পঠিওৱা হৈছে।
জানিব পৰা মতে, নিউয়ৰ্কৰ মানহাটানত এটা বিলাসী কনডোমিনিয়াম ক্ৰয়ৰ সৈতে জড়িত আৰ্থিক লেনদেনৰ সন্দৰ্ভত ইডিয়ে আম্বানী আৰু তেওঁৰ পত্নীক সোধা-পোছাৰ বাবে মাতিছিল। উক্ত গোচৰত ৰিলায়েন্স কমিউনিকেচনৰ প্ৰাক্তন অধ্যক্ষ পুনীত গাৰ্গক গ্ৰেপ্তাৰ কৰিছে।
শেহতীয়াকৈ উচ্চতম ন্যায়ালয়ৰ নিৰ্দেশত ইডিয়ে বেংক জালিয়াতি, আৰ্থিক অনিয়মৰ কেইবাটাও অভিযোগ আৰু অনিল ধীৰুভাই আম্বানি গ্ৰুপৰ (এ ডি এ জি) বিৰুদ্ধে গোচৰৰ তদন্তৰ বাবে এখন এছ আই টি গঠন কৰিছে। তাৰ ভিতৰত ৪০ হাজাৰ কোটি টকাৰ দুৰ্নীতিৰ ক্ষেত্ৰত টিনাৰ নাম আহিছে। যোৱা সপ্তাহত উচ্চতম ন্যায়ালয়ে ইডিক এ ডি এ জিৰ বিৰুদ্ধে সকলো গোচৰৰ তদন্তৰ বাবে বিশেষ তদন্তকাৰী দল (এছ আই টি) গঠন কৰিবলৈ নিৰ্দেশ দিছিল।
শীৰ্ষ আদালতে কয়, “তদন্ত নিৰপেক্ষভাৱে, স্বতন্ত্ৰভাৱে, ক্ষিপ্ৰতাৰে আৰু নিস্বাৰ্থভাৱে কৰিব লাগিব।” কেৱল সেয়াই নহয়, আনুষংগিক গোচৰসমূহত কোনো ধৰণৰ গোপন বুজাবুজি, ষড়যন্ত্ৰ ইত্যাদি হৈছে নেকি, তাক চাবলৈও উচ্চতম ন্যায়ালয়ে চি বি আইক নিৰ্দেশ দিয়ে।
বিগত এবছৰ ধৰি অনিল আম্বানী আৰু তেওঁৰ কোম্পানী ৰিলায়েন্স গ্ৰুপৰ বিৰুদ্ধে কেইবাটাও গোচৰৰ তদন্ত চলাই আহিছে ইডিয়ে। ধন সৰবৰাহ প্ৰতিৰোধ আইনৰ (পি এম এল এ) অধীনত তিনিটা গোচৰ ৰুজু কৰা হৈছে। প্ৰায় ১২ হাজাৰ কোটি টকাৰ সম্পত্তিও জব্দ কৰিছে ইডিয়ে। সেই সময়তে আম্বানীৰ কোম্পানীত এটা গুৰুত্বপূৰ্ণ পদবীত থকা পুনীতক গ্ৰেপ্তাৰ কৰা হৈছিল।
