এটা খালী ঘৰত এগৰাকী সাত বছৰীয়া তিব্বতী (Seven-year-old Tibetan) নাবালিকাক ধৰ্ষণ (Rape of a minor)। বিজেপিশাসিত এখন ৰাজ্যত পুনৰ এক চাঞ্চল্যকৰ ঘটনা উন্মোচিত হৈছে। সংবাদ মাধ্যমৰ সূত্ৰ অনুসৰি, এই ঘটনা সংঘটিত হৈছে ওড়িশা (Odisha)ত। সোমবাৰে আৰক্ষীয়ে জনোৱা মতে, গজাপতি জিলাত এগৰাকী ৭ বছৰীয়া তিব্বতী নাবালিকাক ধৰ্ষণ কৰা হয়। এই ঘটনাৰ অভিযোগত আৰক্ষীয়ে গ্ৰেপ্তাৰ কৰিছে এজন কিশোৰক। তেওঁক জেৰা কৰা হৈছে।
তিব্বতী নাবালিকাগৰাকী ঘৰত অকলে থকাৰ সময়তে এই ঘটনা সংঘটিত হোৱা বুলিও আৰক্ষীয়ে জানিবলৈ দিয়ে। তেওঁৰ পিতৃ-মাতৃ পৰিয়ালৰ অনুষ্ঠান এটালৈ যোৱাৰ সময়ত সংঘটিত যৌন নিৰ্যাতনৰ ঘটনা চিচিটিভিৰ ফুটেজতো বন্দী হৈছে। আৰক্ষীয়ে তদন্তৰ বাবে ফুটেজ পৰীক্ষা কৰি আছে। নাবালিকাগৰাকীয়ে ঘৰলৈ উভতি অহাৰ পিছত পিতৃ-মাতৃক এই ধৰ্ষণৰ বিষয়ে অৱগত কৰে।
ইয়াৰ পিছতে পৰিয়ালটোৱে মোহনা থানাত ধৰ্ষণৰ অভিযোগ দাখিল কৰে। গজপতি আৰক্ষী বিষয়াই জানিবলৈ দিয়া মতে, কিশোৰজনক আটক কৰি জেৰা অব্যাহত ৰাখিছে। তেওঁক কিশোৰ আদালতত হাজিৰ কৰা হ’ব। এই ঘটনাক লৈ স্থানীয় ৰাইজেও প্ৰতিবাদ সাব্যস্ত কৰে। অভিযুক্ত কিশোৰজনৰ বিৰুদ্ধে কঠোৰ ব্যৱস্থা ল’বলৈ আৰক্ষীক অনুৰোধ জনায়।
বিগত বছৰ বিজেপিশাসিত ৰাজ্যখনত কেইবাগৰাকীও নাবালিকা, কিশোৰী, কলেজীয়া ছাত্ৰীক ধৰ্ষণ আৰু যৌন নিৰ্যাতন চলোৱা হৈছিল। উল্লেখ্য যে যোৱা ১১ আগষ্টত ১৩ বছৰীয়া এগৰাকী কিশোৰীয়ে নিজৰ শৰীৰত অগ্নিসংযোগ কৰাৰ ঘটনা পোহৰলৈ আহে। সেইটোও আছিল ওড়িশাৰে এটা কাণ্ড। বালেশ্বৰ, বালংগা, আৰু কেন্দ্ৰপাৰাৰ পিছত এইবাৰ ওড়িশাৰ বৰগড় জিলাত সংঘটিত হৈছে এই ঘটনা। আনহাতে, ৩০ দিনৰ ভিতৰত চাৰিবাৰকৈ সংঘটিত হয় একে ঘটনা।
