আমেৰিকা (America)ই বিভিন্ন দেশৰ ১৪ খন তেল টেংকাৰত নিষেধাজ্ঞা (Prohibition in the oil tanker) আৰোপ কৰিছে। ভাৰতকে ধৰি ৮ খন দেশৰ মুঠ ১৫টা কোম্পানীয়েও আমেৰিকাৰ ক্ৰোধৰ সন্মুখীন হৈছে। ইৰাণৰ তেল পৰিবহণৰ লগত জড়িত থকাৰ অভিযোগত ড’নাল্ড ট্ৰাম্প প্ৰশাসনে এই নিষেধাজ্ঞা ঘোষণা কৰিছে।
শুকুৰবাৰে ওমানত ইৰাণ আৰু আমেৰিকাৰ মাজত মধ্যস্থতামূলক বৈঠক অনুষ্ঠিত হয়। দুয়োখন দেশৰ বিষয়াসকলৰ মাজত পৰোক্ষ আলোচনা অনুষ্ঠিত হয়। ইয়াৰ পিছতে আমেৰিকাৰ বিদেশ মন্ত্ৰালয়ে এক বিবৃতি প্ৰকাশ কৰি ইৰাণৰ তেল পৰিবহণৰ বিৰুদ্ধে নিষেধাজ্ঞা আৰোপ কৰাৰ কথা ঘোষণা কৰে। এই তালিকাত চীন, তুৰস্ক, সংযুক্ত আৰব আমিৰশ্বাহী আদি দেশৰ জাহাজ আৰু বিভিন্ন কোম্পানী অন্তৰ্ভুক্ত কৰা হৈছে। বিবৃতিটোত কোৱা হৈছে, “আমি একাধিক জাহাজ, কোম্পানী, আৰু ব্যক্তিৰ ওপৰত নিষেধাজ্ঞা আৰোপ কৰিছো যাতে তেহৰানে ইয়াৰ পৰা আহৰণ কৰা ৰাজহ সন্ত্ৰাসবাদী কাৰ্যকলাপক সহায় কৰিবলৈ আৰু নিজৰ নাগৰিকক দমন কৰিবলৈ ব্যৱহাৰ নকৰে সূচী। আমি ১৪ খন জাহাজক ইৰাণৰ পেট্ৰ’লিয়াম, পেট্ৰ’কেমিকেল আৰু পেট্ৰ’কেমিকেল সামগ্ৰী কঢ়িয়াই নিয়া হিচাপে চিনাক্ত কৰিছো। ইয়াৰ উপৰি ১৫টা কোম্পানীক ইৰাণৰ তেল আৰু পেট্ৰ’কেমিকেলৰ ক্ৰেতা হিচাপে চিনাক্ত কৰা হৈছে। দুজন ব্যক্তিও এই তালিকাত আছে।”
আমেৰিকাৰ অভিযোগ যে ইৰাণ চৰকাৰে নিজৰ নাগৰিকৰ সুৰক্ষাক গুৰুত্ব নিদিয়াকৈ অস্থিৰ পৰিস্থিতি সৃষ্টি কৰাত বাৰে বাৰে গুৰুত্ব আৰোপ কৰে। ইৰাণক দুৰ্বল কৰাৰ বাবে আগন্তুক দিনতো এনে পদক্ষেপ গ্ৰহণ কৰি যাব বুলি জানিবলৈ দিছে। নিষেধাজ্ঞাৰ তালিকাত কেৰিবিয়ানৰ বাৰ্বাডোছৰ কেইবাটাও কোম্পানী, সংযুক্ত আৰব আমিৰশ্বাহীৰ কেইবাটাও কোম্পানী, ওচেনিয়াৰ মাৰ্শ্বেল দ্বীপপুঞ্জৰ কোম্পানী, চীনৰ কোম্পানী, পূব আফ্ৰিকাৰ ছিচেলছৰ কোম্পানী, কাজাখস্তানৰ কোম্পানী, তুৰস্কৰ কেইবাটাও কোম্পানী আৰু ভাৰতৰ এটা কোম্পানী অন্তৰ্ভুক্ত কৰা হৈছে।
আমেৰিকাৰ বিদেশ মন্ত্ৰালয়ে কয় যে এলিভেট মেৰিন মেনেজমেণ্ট প্ৰাইভেট লিমিটেড হৈছে কেমেৰুণৰ এখন তেল টেংকাৰ নিয়ন্ত্ৰণ কৰা ভাৰতীয় কোম্পানী। জাহাজখনৰ নাম বেনেডিক্ট। এই জাহাজখনে ২০২৫ চনৰ ছেপ্টেম্বৰৰ পৰা নৱেম্বৰৰ ভিতৰত কমেও তিনিবাৰকৈ ইৰাণৰ তেল পৰিবহণ কৰিছিল। এই কোম্পানীটোৰ মালিক আকাশ অনন্ত শ্বিণ্ডেৰ ওপৰতো নিষেধাজ্ঞা আৰোপ কৰা হৈছে। তেওঁ এজন ভাৰতীয় নাগৰিক।
অৱশ্যে ওমানত ইৰাণ-আমেৰিকাৰ আলোচনা কেনেকুৱা হ’ল সেই বিষয়ে একো জানিব পৰা হোৱা নাই। অৱশ্যে তাৰ পিছত আমেৰিকাৰ এনে ঘোষণায়ো বৈঠকৰ ইংগিত দিয়ে। পৰ্যবেক্ষকৰ মতে, এই বৈঠকত সমস্যাৰ কোনো ইতিবাচক সমাধান পোৱা নগ’ল।
