শুকুৰবাৰে পাকিস্তানৰ ৰাজধানী ইছলামাবাদৰ মছজিদত সংঘটিত হয় এক আত্মঘাতী বিস্ফোৰণ (Pakistan bomb blast)। তাৰ পিছতে চুবুৰীয়া দেশখনে পুনৰ আফগানিস্তান আৰু ভাৰতৰ প্ৰতি আঙুলি টোঁৱাইছে।
দেশখনৰ প্ৰতিৰক্ষা মন্ত্ৰী খোৱাজা আছিফে দাবী কৰিছে যে আত্মঘাতী বোমাৰুজন আফগানিস্তানলৈ গৈছিল। আনকি তেওঁ দাবী কৰে যে এই বিস্ফোৰণত ভাৰতৰ হাত আছে। এই সন্দৰ্ভত শুকুৰবাৰে নিশা নতুন দিল্লীয়ে এক বিবৃতি প্ৰকাশ কৰে। পাকিস্তানৰ এই দাবী নাকচ কৰাৰ লগতে দেশখনৰ চৰকাৰৰ নীতিক তীব্ৰ সমালোচনা কৰা হৈছে।
পাকিস্তানৰ মন্ত্ৰীগৰাকীয়ে দাবী কৰে যে আত্মঘাতী বোমাৰুজনে আফগানিস্তানৰ পৰা একাধিকবাৰ পাকিস্তানলৈ গৈছিল। ইয়াৰ প্ৰমাণ পোৱা গৈছে। তেওঁ ছ’চিয়েল মিডিয়াত লিখিছে, “ভাৰত আৰু তালিবানৰ মাজৰ সম্পৰ্ক পোহৰলৈ আহিছে। সন্ত্ৰাসবাদীজনক নিৰাপত্তাৰক্ষীয়ে ৰখাই দিছিল।
তেতিয়াই তেওঁ মছজিদৰ শেষৰ শাৰীত নামাজ পঢ়াসকলৰ মাজত থিয় হৈ গুলীচালনা আৰম্ভ কৰিছিল আৰু বিস্ফোৰণ ঘটাইছিল।” ইয়াৰ পিছত আছিফে ভাৰতক লক্ষ্য কৰি দাবী কৰে যে ভাৰতে পাকিস্তানৰ হাতত পৰাস্ত হোৱাৰ পিছত অন্য ধৰণে প্ৰতিশোধ ল’বলৈ চেষ্টা কৰিছে। কাৰণ ভাৰতৰ পোনপটীয়াকৈ যুঁজ দিয়াৰ ক্ষমতা নাই।
যোৱানিশা ভাৰতৰ বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালে এক বিবৃতিত কয়, “ইছলামাবাদৰ মছজিদত হোৱা বিস্ফোৰণৰ প্ৰতিবাদ কৰিছোঁ আৰু প্ৰাণ হেৰুওৱাৰ বাবে শোক প্ৰকাশ কৰিছোঁ। কিন্তু এই সমস্যাক গুৰুত্ব নিদিয়াকৈ পাকিস্তানে নিজৰ মাটিত জন্ম লোৱা দুষ্কৃতিকাৰীৰ বাবে আনক দোষাৰোপ কৰাটো অতি দুৰ্ভাগ্যজনক। ভাৰতে এনে কোনো অভিযোগ নাকচ কৰে। সেইবোৰ সম্পূৰ্ণ ভিত্তিহীন।”
আফগানিস্তানেও খাৰিজ কৰিছে পাকিস্তানী মন্ত্ৰীগৰাকীৰ এই দাবী।
তেওঁলোকৰ তালিবান চৰকাৰে এনে দাবীক ‘দায়িত্বজ্ঞানহীন’ বুলি মন্তব্য কৰিছে। কোৱা হৈছে যে পাকিস্তানে উচিত তদন্ত আৰু পুংখানুপুংখ তদন্ত নকৰাকৈয়ে অযুক্তিকৰ আৰু ভিত্তিহীনভাৱে আনৰ ওপৰত দোষ জাপি দিবলৈ চেষ্টা কৰিছে।
লগতে তেওঁলোকে এই প্ৰশ্ন উত্থাপন কৰে যে আক্ৰমণৰ লগে লগে যদি পাকিস্তান চৰকাৰে আক্ৰমণকাৰীৰ পৰিচয় আৰু গতিবিধিৰ বিষয়ে জানিছিল, তেন্তে তেওঁলোকে কিয় আক্ৰমণ ৰোধ কৰিব নোৱাৰিলে? উল্লেখ্য যে ইছলামাবাদৰ ইমাম্বাৰা ছিয়া মছজিদত শুকুৰবাৰৰ নামাজৰ সময়ত সংঘটিত হয় এই বিস্ফোৰণ।
এতিয়ালৈকে আনুষ্ঠানিকভাৱে মৃত্যু হোৱা লোকৰ সংখ্যা হৈছে ৩১ জন। কিন্তু আহত হৈছে ১৫০ জনতকৈ অধিক লোক। ‘ছুইচাইড ভেষ্ট’ পিন্ধি মছজিদত প্ৰৱেশ কৰে আত্মঘাতী বোমাৰুজন।
কিছুদিন পূৰ্বে পাকিস্তানে বেলুচিস্তানত সংঘটিত সন্ত্ৰাসবাদী আক্ৰমণৰ বাবে ভাৰতক দোষাৰোপ কৰিছিল। এইবাৰ ইছলামাবাদৰ কাণ্ডৰ লগত ভাৰত জড়িত থকাৰ অভিযোগো উত্থাপন কৰিছে। কিন্তু সচৰাচৰৰ দৰে ইয়াৰ কোনো প্ৰমাণ দিব পৰা নাই।
