সাধাৰণতে দেখা যায় পুৰুষৰ হাতত নাৰী নিৰ্যাতনৰ ঘটনা। স্বামীয়ে পত্নীক নিৰ্যাতন কৰা ঘটনা প্ৰায় দৈনিক খবৰ হিচাপে প্ৰকাশ পায়। কিন্তু তাৰ বিপৰীতে এইখন সমাজত নাৰীৰ হাততো পুৰুষ নিৰ্যাতিত হোৱাৰ ঘটনা সংঘটিত হৈ আছে। এই ঘটনাটো তাৰেই প্ৰমাণ। মধ্যপ্ৰদেশ (Madhya Pradesh)ৰ সতনাৰ এটা ভয়ংকৰ ঘৰুৱা হিংসাৰ ভিডিঅ’ই ইতিমধ্যে ছ’চিয়েল মিডিয়া (Social Media)ত আলোড়নৰ সৃষ্টি কৰিছে। ভাইৰেল হোৱা ভিডিঅ’টোত এজন লোকক নিজৰ ঘৰতে পত্নীয়ে নৃশংসভাৱে প্ৰহাৰ (Wife brutally beats her) কৰা দেখা গৈছে। আতংকিত লোকজনে নিজেই নিৰ্যাতনৰ দৃশ্যটো নিজৰ মোবাইল ফোনত ৰেকৰ্ড কৰে, যাতে অন্ততঃ তেওঁৰ ওপৰত এই ভয়ংকৰ নিৰ্যাতন চলোৱাৰ প্ৰমাণ পোৱা যায়। ভিডিঅ’টোৰ আৰম্ভণিতে দেখা গৈছে যে মানুহজনে এখন হাতত কেমেৰা লৈ কঁপা কঁপা মাতেৰে পত্নীক ওচৰলৈ নাহিবলৈ অনুৰোধ জনাইছে। তেওঁ বাৰে বাৰে কয় যে তেওঁ ভয় খাইছে। কিন্তু তেওঁৰ এই অনুৰোধৰ পত্নীৰ ওপৰত কোনো প্ৰভাৱ পৰা নাই। ইয়াৰ বিপৰীতে পত্নীয়ে ভাবুকি দিয়া, ভয় খুৱাই আৰু ক্ষন্তেকতে স্বামীক খঙত আক্ৰমণ কৰা দেখা যায়।
ভিডিঅ’টোত স্পষ্ট হৈ পৰিছে যে মহিলাগৰাকীয়ে প্ৰথমে মাৰপিট কৰিবলৈ আৰম্ভ কৰে আৰু পিছত এটা পৰ্যায়ত স্বামীক ডিঙি চেপি হত্যা কৰিবলৈ চেষ্টা কৰে। অসহায় স্বামীয়ে তেতিয়া হতাশজনক মাতেৰে চিঞৰি উঠে, “মোক মাৰি পেলোৱা, মাৰি পেলোৱা…।” এই যন্ত্ৰণাদায়ক চিঞৰটো কেৱল শাৰীৰিক বিষ নহয়, মানসিক বিকলতাৰ দুখজনক সাক্ষ্যও। আটাইতকৈ মৰ্মান্তিক কথাটো হ’ল যে এই নিৰ্যাতন এটা বন্ধ কোঠাৰ ভিতৰত সংঘটিত হৈছে আৰু সেই সময়ত ব্যক্তিজনৰ মাতৃও ঘৰতে উপস্থিত আছিল। চৰম আতংকিত হৈ তেওঁ হঠাতে চিঞৰি উঠে, “মোক বচাওক মা…।” এই চিঞৰটোৱেই প্ৰমাণ কৰে যে পৰিস্থিতি কিমান ভয়াৱহ হৈ পৰিছিল।
ভিডিঅ’টোৰ শেষত দেখা গৈছে যে তেওঁ কেনেবাকৈ ঘৰৰ পৰা ওলাই আহি মাতৃৰ ওচৰত আশ্ৰয় লৈছিল। তাৰ পিছত মাতৃয়ে পুত্ৰক ধৰি ৰাখিছিল, বোৱাৰীয়েকৰ আক্ৰমণৰ পৰা ৰক্ষা কৰিবলৈ চেষ্টা কৰিছিল। কিন্তু আচৰিত কথাটো হ’ল, এই সকলোবোৰৰ মাজতো মহিলাগৰাকীৰ মাজত অনুশোচনাৰ কোনো চিন নাই। তাৰ পৰিৱৰ্তে স্বামী আৰু শাহুৱেকক বাহিৰত এৰি দুৱাৰখন বন্ধ কৰি নিজকে ঘৰৰ ভিতৰতে আবদ্ধ কৰি ৰাখে।
উল্লেখ্য যে দেশত স্বামীৰ ওপৰত নিৰ্যাতনৰ কেইবাটাও অভিযোগ চৰ্চালৈ অহাৰ সময়ত এই ভিডিঅ’টো পোহৰলৈ আহিছে। শেহতীয়াকৈ অতুল সুভাষ গোচৰ বা আগ্ৰাৰ টিচিএছ মেনেজাৰ গোচৰৰ দৰে ঘটনাত পুৰুষৰ ওপৰত হোৱা নিৰ্যাতনৰ বিষয়টোৱে ৰাজহুৱা ক্ষেত্ৰখনত এক নতুন বিতৰ্কৰ সূচনা কৰিছে। সতনাৰ এই ভিডিঅ’টোৱে সেই বিতৰ্ক আৰু অধিক তীব্ৰতৰ কৰি তুলিছে। দীৰ্ঘদিন ধৰি সমাজত ঘৰুৱা হিংসা মূলতঃ নাৰীৰ ওপৰত হোৱা নিৰ্যাতনৰ সন্দৰ্ভত চৰ্চালৈ আহিছে, যিটো নিঃসন্দেহে এক গভীৰ আৰু বাস্তৱ সমস্যা। কিন্তু এই ঘটনাই দেখুৱাইছে যে নিৰ্যাতনৰ বলি হোৱাসকল সদায় মহিলায়ে নহয়, বহু সময়ত পুৰুষেও ভয়, লাজ আৰু সামাজিক অৱহেলাৰ বাবে নিৰ্যাতন সহ্য কৰে। এই ভিডিঅ’টোৰ সত্যতা আৰু ঘটনাৰ প্ৰেক্ষাপটৰ তদন্ত কৰাটো এতিয়া প্ৰশাসনৰ দায়িত্ব।
