ছত্তীশগড়ৰ (Chhattisgarh) বিজাপুৰত মাওবাদীয়ে সংৰোপণ কৰা ইম্প্ৰভাইজড এক্সপ্ল’ছিভ ডিভাইচ (আই ই ডি) বিস্ফোৰণত (Explosion) এঘাৰজন নিৰাপত্তাৰক্ষী আহত (Security guard injured) হয়। তেওঁলোকক বিমানযোগে ৰায়পুৰলৈ লৈ যোৱা হৈছে। প্ৰাথমিক প্ৰতিবেদন অনুসৰি, ছটা আই ই ডি বিস্ফোৰণ ঘটিছে। দেওবাৰে সংঘটিত হোৱা বিস্ফোৰণৰ পিছত প্ৰতিকূল পৰিস্থিতিৰ বাবে আহত জোৱানসকলক উদ্ধাৰ কৰিবলৈ যথেষ্ট সংগ্ৰাম কৰিবলগীয়া হয়।
মাওবাদীৰ উপলস্থিতিৰ তথ্য লাভ কৰি শনিবাৰে বিজাপুৰৰ উছুৰ অঞ্চলত নিৰাপত্তাৰক্ষীয়ে অভিযান আৰম্ভ কৰে। ছত্তীশগড় আৰু তেলেংগানাৰ সীমান্তৱৰ্তী কোৰেগুটা পাহাৰৰ অৰণ্যত মাওবাদী আত্মগোপন কৰি থকাৰ তথ্য লাভ কৰে। অঞ্চলটোত মাওবাদীৰ সশস্ত্ৰ গেৰিলা বাহিনীৰ সদস্যই আত্মগোপন কৰি থকা বুলি সন্দেহ কৰা হৈছিল। এক গোপন সূত্ৰৰ ভিত্তিত ছত্তীশগড় জিলা ৰিজাৰ্ভ গাৰ্ড আৰু চি আৰ পি এফে মাওবাদীৰ সন্ধানত যৌথ অভিযান আৰম্ভ কৰে। জংঘলত যুদ্ধৰ বিশেষজ্ঞ অৰ্ধসামৰিক ‘কোব্ৰা’ কমাণ্ডোও তাত আছিল।
দেওবাৰেও চলে মাওবাদীৰ বিৰুদ্ধে অভিযান। জানিব পৰা মতে, সেই অভিযানৰ সময়তে মাওবাদীয়ে সংৰোপণ কৰা আই ই ডি বিস্ফোৰণত ১১ জন জোৱান আহত হয়। প্ৰথমে জানিব পৰা মতে আহতসকলৰ এজন চি আৰ পি এফৰ ‘কোব্ৰা’ বাহিনীৰ উপ-পৰিদৰ্শক। ছত্তীশগড় আৰক্ষীৰ এগৰাকী বিষয়াই কয়, “এটা দুৰ্গম অঞ্চলত বিস্ফোৰণ সংঘটিত হয়, যাৰ বাবে তেওঁলোকক সেই স্থানৰ পৰা উদ্ধাৰ কৰাত অসুবিধা হয়। অৱশ্যে আটাইকেইজনক উদ্ধাৰ কৰি উন্নত চিকিৎসাৰ বাবে হেলিকপ্টাৰেৰে ৰায়পুৰলৈ লৈ যোৱা হয়। আহত আটাইকেইজন জোৱান বৰ্তমান বিপদৰ বাহিৰত। তেওঁলোকৰ অৱস্থা সুস্থিৰ আৰু আটাইকেইজন সচেতন অৱস্থাত আছে।”
অৱশ্যে এই বিস্ফোৰণ দেওবাৰে কেতিয়া হৈছিল আৰু কেতিয়া উদ্ধাৰ কৰা হৈছিল সেয়া এতিয়াও স্পষ্ট হোৱা নাই। সূত্ৰৰ পৰা জানিব পৰা মতে, তিনিজন জোৱানে ভৰিত আঘাত পাইছে। আন তিনিজন জোৱানে চকুত আঘাত পাইছে।
উল্লেখ্য যে দুদিন পূৰ্বে ছত্তীশগড়ৰ বিজাপুৰৰ আন এটা অঞ্চলত মাওবাদীয়ে লুকুৱাই ৰখা বিস্ফোৰক উদ্ধাৰ কৰিছিল নিৰাপত্তা বাহিনীয়ে। জংঘলৰ পৰা উদ্ধাৰ হয় ১৬টা আই ই ডি, ৭৮ডাল জেলেটিন ষ্টিক, এক কিলোগ্ৰাম বন্দুকৰ গুড়ি আৰু ৪টা বেটাৰী। ইয়াৰ উপৰি কেইবাটাও বেটাৰী আৰু ৱাকি-টকিও উদ্ধাৰ কৰা হৈছে।
