পশ্চিম কাৰ্বি আংলঙৰ খেৰণিত উত্তাল পৰিৱেশ। নিশা খেৰণিৰ ফেলাংপিত অনিৰ্দিষ্টকালীন আমৰণ অনশনত অৱস্থান কৰি থকা প্ৰতিবাদকাৰীক আৰক্ষীয়ে উঠাই লৈ যোৱাক কেন্দ্ৰ কৰি উত্তপ্ত পৰিস্থিতি। আৰক্ষীয়ে উগ্ৰপন্থীৰ দৰে প্ৰতিবাদকাৰীক উঠাই নিয়াৰ অভিযোগ আৰক্ষীৰ বিৰুদ্ধে। প্ৰতিবাদকাৰীক শীঘ্ৰে মুকলি কৰাৰ দাবীত খেৰণিত পথ অৱৰোধ সহস্ৰাধিক খিলঞ্জীয়া জনতাৰ।
প্ৰায় ১৫দিন ধৰি কাৰ্বি আংলংবাসীয়ে সাব্যস্ত ৰখা প্ৰতিবাদে সোমবাৰৰ দিনটোত অধিক উত্তপ্ত হৈ উঠিল। কাৰ্বি ভূমিত অনা কাৰ্বি লোকৰ অগ্ৰাসনৰ বিৰুদ্ধে সাব্যস্ত কৰিছিল প্ৰতিবাদ। কাৰ্বিভূমিৰ এনে অঞ্চলত অচিৰেই উচ্ছেদ চলাব বুলি বাৰে বাৰে ঘোষণা কৰিও কোনো ব্যৱস্থা গ্ৰহণ কৰা নাছিল প্ৰশাসনে। চলিত বৰ্ষৰ ফেব্ৰুৰাৰী মাহৰ পৰাই এনে ভিন্ন দাবীৰে প্ৰতিবাদ সাব্যস্ত কৰি ৰাখিছিল কাৰ্বি ৰাইজে।
সোমবাৰৰ দিনটোত ক্ষোভৰ বহিঃপ্ৰকাশ ঘটিল ৰাইজৰ। প্ৰতিবাদে ল’লে ভয়ংকৰ ৰূপ। অনশনত বহি থকা প্ৰতিবাদকাৰীক আটক কৰাৰ পিছতে অধিক উগ্ৰ হৈ উঠে জনতা।ৰুদ্ৰমূৰ্তি ধাৰণ কৰি জনতাই তুলিৰাম ৰংহাঙৰ পুৰণি বাসগৃহটো জ্বলাই দিয়ে। পৰিস্থিতি নিয়ন্ত্ৰণ কৰিবলৈ আৰক্ষীয়ে কৰা গুলীচালনাত ৩গৰাকীকৈ লোক আহত হৈছে। বৰ্তমানো পৰিৱেশ শান্ত হোৱা নাই। আৰক্ষী আৰু প্ৰতিবাদকাৰীৰ মাজত বৰ্তমানেও চলি আছে হতাহতি।
উল্লেখ কৰা প্ৰয়োজন যে, সোমবাৰে পুৱাৰ ভাগত তুলিৰাম ৰংহাঙে প্ৰতিক্ৰিয়া প্ৰকাশ কৰিছিল যে, প্ৰতিবাদকাৰীসকলক আটক কৰা নাই। উন্নত চিকিতসাৰ বাবেহে গুৱাহাটীলৈ লৈ যোৱা হৈছে। তুলিৰাম ৰংহাঙৰ বিৰুদ্ধে প্ৰতিবাদৰ প্ৰতি গুৰুত্ব নিদিয়াৰ অভিযোগ উত্থাপিত হৈছে। প্ৰতিবাদকাৰীসকলে বিগত ১৫দিনে দাবী কৰি আহিছিল যে, এই বিষয়টোক লৈ তুলিৰাম ৰংহাঙৰ লগতে মুখ্যমন্ত্ৰী পৰ্যায়ত এক আলোচনা তেওঁলোকৰ সৈতে হওঁক।
