কেন্দ্ৰীয় চৰকাৰৰ ‘উমিদ’ পৰ্টেলত ৱাকফৰ সম্পত্তিৰ সবিশেষ পঞ্জীয়নৰ সময়সীমা আৰু ছমাহ বৃদ্ধিৰ বাবে উচ্চতম ন্যায়ালয়ত (Supreme Court) দাখিল কৰা আবেদন খাৰিজ। সোমবাৰে দেশৰ শীৰ্ষ আদালতে এই আবেদন খাৰিজ কৰে।
অৱশ্যে আদালতে লগতে কয় যে যদি কিবা অসুবিধা হয় বা যিকোনো ক্ষেত্ৰতে সময়সীমা বৃদ্ধিৰ প্ৰয়োজন হয়, তেন্তে সংশ্লিষ্ট ন্যায়াধিকৰণত আবেদন কৰিব পাৰিব।
কেন্দ্ৰীয় পৰ্টেলত ৱাকফৰ সম্পত্তি পঞ্জীয়ন কৰাটো বাঞ্ছনীয়। এই ঘোষণা সোমবাৰে উচ্চতম ন্যায়ালয়ৰ ন্যায়াধীশ দীপাংকৰ দত্ত আৰু ন্যায়াধীশ অগাষ্টিন জৰ্জ মাছিৰ বিচাৰপীঠৰ। অৱশ্যে পঞ্জীয়নৰ সময়ত যদি কোনো কাৰিকৰী ভুল লক্ষ্য কৰা হয় তেন্তে ৱাকফ ন্যায়াধিকৰণত অৱগত কৰিব পৰা যাব বুলিও বিচাৰপীঠে উল্লেখ কৰে।
লগতে সময়সীমা বৃদ্ধিৰ বাবে আবেদন কৰাৰো সুযোগ থাকিব। এই ক্ষেত্ৰত ন্যায়াধিকৰণে বিবেচনা কৰিব পাৰে।
সোমবাৰৰ শুনানিত বিচাৰপীঠে আবেদনকাৰীক কয়, “আপোনালোক ন্যায়াধিকৰণলৈ যাওক। তেওঁলোকে নিৰ্দিষ্ট গোচৰৰ ভিত্তিত সিদ্ধান্ত ল’ব। আমি ৱাকফ আইন পুনৰ লিখিব নোৱাৰো। আইন কাৰ্যকৰী হ’ব দিয়ক।
আমি কিয় হস্তক্ষেপ কৰিব লাগে?”
উল্লেখ্য যে কেন্দ্ৰীয় চৰকাৰে যোৱা ৬ জুনত চৰকাৰী পৰ্টেলত ৱাকফৰ সম্পত্তি পঞ্জীয়ন কৰিবলৈ এক নিৰ্দেশ জাৰি কৰিছিল। নিৰ্দেশনাত ‘উমিদ’ পৰ্টেলৰ কথা উল্লেখ কৰা হৈছে। এই নিৰ্দেশনাত উল্লেখ কৰা হৈছে যে সমগ্ৰ ভাৰতবৰ্ষৰ সকলো ৱাকফৰ সম্পত্তিৰ সবিশেষ ছমাহৰ ভিতৰত সংশ্লিষ্ট পৰ্টেলত পঞ্জীয়ন কৰিব লাগে। উক্ত সময়সীমা ৫ ডিচেম্বৰত সমাপ্ত হ’ব।
আবেদনকাৰীৰ হৈ উপস্থিত থকা অধিবক্তা কপিল ছিবালে যুক্তি আগবঢ়ায়, “ছমাহ সময় অতি কম। এই বিষয়ে বহুতে সবিশেষ নাজানে। ছমাহৰ সময় সকলো সবিশেষ সংগ্ৰহ কৰি পৰ্টেলত পঞ্জীয়ন কৰিবলৈ কম সময়।” আনহাতে, চৰকাৰৰ প্ৰতিনিধি হিচাপে হাজিৰ হোৱা ছলিচিটৰ জেনেৰেল তুষাৰ মেহতাই যুক্তি আগবঢ়ায় যে ৱাকফ আইনখনতে ন্যায়াধিকৰণত প্ৰযোজ্য হোৱাৰ ব্যৱস্থা আছে।
উল্লেখ্য যে ৱাকফ সংশোধনী বিধেয়কখন লোকসভাত বিৰোধীৰ ২৩২টা ভোটৰ বিপৰীতে ২৮৮টা ভোটত গৃহীত হয়। আনহাতে, ৰাজ্যসভাত ১২৮ গৰাকী সাংসদে বিধেয়কখনৰ সপক্ষে ভোটদান কৰাৰ বিপৰীতে ৯৫ গৰাকী সাংসদে বিৰুদ্ধে ভোটদান কৰে।
সংসদৰ দুয়োখন সদনত সংশোধিত বিধেয়কখন গৃহীত হোৱাৰ পাছত ৰাষ্ট্ৰপতি দ্ৰৌপদী মুৰ্মুৰ সন্মতিসাপেক্ষে ৫ এপ্ৰিলত আইনত পৰিণত হয়। অৱশ্যে এই সংশোধনীক লৈ প্ৰশ্ন উত্থাপন কৰিছে বিৰোধীয়ে।
