প্ৰতিবছৰৰ দৰে এই বছৰো ৰেংমা নাগা কালচাৰেল সমিতিৰ উদ্যোগত ডিফু আৰবৰেটাম আৰু ক্ৰাফ্ট চেণ্টাৰ চৌহদত বৰ্ণাঢ্য কাৰ্যসূচীৰে ৰেংমা নাগা সকলৰ বাৰ্ষিক শস্য চপোৱা আৰু কৃতজ্ঞতা সূচক উৎসৱ উদযাপন কৰা হয় ৷ কাৰ্বি আংলং স্বায়ত্তশাসিত পৰিষদত ৰেংমা সম্প্ৰদায়ক প্ৰতিনিধিত্ব কৰা এমএচি ফেনপিগা ৰেংমাৰ তত্বাৱধনাত আয়োজিত নাগাদা উৎসৱত মুখ্য অতিথি হিছাপে উপস্থিত থাকে কাৰ্বি আংলং স্বায়ত্তশাসিত পৰিষদৰ চিইএম ডঃ তুলিৰাম ৰংহাঙ ৷
তদুপৰি কাৰ্বি আংলং স্বায়ত্তশাসিত পৰিষদৰ কেইবাগৰাকী ইএম, এমএচি, বোৰ্ড চেয়াৰমেন, বিভিন্ন জাতি-জনগোষ্ঠীৰ সাংস্কৃতিক সমাজৰ নেতা সকল উপস্থিত থাকে ৷ কাৰ্যসূচীৰ প্ৰাৰম্ভনিতে আদৰণি ভাষণ প্ৰদান কৰে এমএচি ফেনপিগা ৰেংমাই ৷ ইয়াৰ পাছত আৰম্ভনি সংগীত জাঁ চালি সমবেত সংগীত পৰিৱেশন কৰা হয় ৷ নাগাদা উৎসৱত ৰেংমা সম্প্ৰদায়ৰ লোকে ৰেংমা পৰাম্পৰাগত সাজ-পাৰ পৰিধান কৰি বাৰ্ষিক শস্য চপোৱা নৃত্য, ফেশ্বন শ্ব’ আৰু বিভিন্ন কলা-কৃষ্টিৰ উৎকৃষ্ট প্ৰদৰ্শন দাঙি ধৰে ৷
সাংবাদিকৰ সৈতে হোৱা বাৰ্তালাপত এমএচি ফেনপিগা ৰেংমাই কয়যে, নাগাদা হৈছে আটাইতকৈ ডাঙৰ নৃত্য -গীতৰ উৎসৱ ৷ শস্য উৎপাদন কৰাৰ পাছত সকলো শস্য এক গোট কৰি ধন্যবাদ জ্ঞাপন কৰা হয় ৷ তদুপৰি ৰেংমা সকলৰ মাজত ইটো গাঁৱে সিটো গাঁৱৰ মাজত হোৱা যুঁজ বাগৰৰ বাবে ক্ষমা খুজি শান্তিৰে বসবাস কৰাৰ সংকল্প লৈ এই নাগাদা উৎসৱ উদযাপন কৰা হয় ৷ এইবাৰ ডিফুত তিনিটা জ’ন ক্ৰমে, চকীহোলাৰ কেলিয়া জ’ন ফংচৰপৰ টেকলুং জ’ন আৰু ডিফু জ’নে এই নাগাদা উৎসৱত অংশ গ্ৰহণ কৰে ৷
আনহাতে বৰজান জ’নে নিজাববীয়াকৈ এই উৎসৱ উদযাপন কৰে বুলি জানিবলৈ দিছে ৰেংমাই ৷ কাৰ্বি আংলং স্বায়ত্তশাসিত পৰিষদৰ চিইএম তুলিৰাম ৰংহাঙক উচ্চ প্ৰশংসা কৰি কয়যে, তুলিৰাম ৰংহাঙ এগৰাকী দক্ষ আৰু দুৰদৰ্শী নেতা ৷ তুলিৰাম ৰংহাঙে প্ৰতিটো জাতি-জনগোষ্ঠীৰ উন্নয়ন সাধন কৰাৰ লগতে ৰেংমা জনগোষ্ঠীৰো উন্নয়ন সাধন কৰিছে ৷
আনহাতে চিইএম তুলিৰাম ৰংহাঙে কয়যে, নাগাদা উৎসৱৰ বাবে কাৰ্বি আংলং স্বায়ত্তশাসিত পৰিষদৰ তৰফৰ প্ৰথমতে ৫ লাখ টকা প্ৰদান কৰা হৈছিল, অহা বছৰৰ পৰা ১০ লাখ টকা প্ৰদান কৰা হব ৷ ৰেংমা সকলৰ নাগাদা উৎসৱ কাৰ্বি সকলৰ কলা, কৃষ্টি সংস্কৃতি লগত প্ৰায় একেই ৷ তদুপৰি অহা বছৰ ৰেংমা সকলৰ বাবে হোষ্টেল আৰু কালচাৰেল হল নিৰ্মান কৰা হব বুলি প্ৰতিশ্ৰুতি প্ৰদান কৰে তুলিৰাম ৰংহাঙে ৷
