দিল্লী বিস্ফোৰণৰ (Delhi Blast) অভিযুক্ত চিকিৎসক ওমৰ-উন-নবীয়ে পাকিস্তানৰ সন্ত্ৰাসবাদী সংগঠন জৈছ-ই-মহম্মদৰ বাবে এটা শ্লীপাৰ চেল স্থাপনৰ দায়িত্বত আছিল। তদন্তকাৰী সূত্ৰ অনুসৰি, ওমৰৰ ফোনত তালাচী চলাই এনে তথ্য পোৱা গৈছে।
সূত্ৰটোৱে দাবী কৰা মতে, তেওঁ মূলতঃ উচ্চ শিক্ষিত আৰু সন্দেহহীন যুৱকক বিচাৰিছিল আৰু তেওঁলোকৰ বিষয়ে তথ্য সংগ্ৰহ কৰিছিল। ইয়াৰ পিছত ছ’চিয়েল মিডিয়াত উক্ত যুৱক-যুৱতীসকলৰ লগত ওমৰে বন্ধুত্ব কৰিব।
উচ্চ শিক্ষিত আৰু সন্দেহহীন যুৱক-যুৱতীক শব্দৰ জালত আবদ্ধ কৰি ব্ৰেইনৱাশ্ব কৰা বুলিও সূত্ৰটোৱে জানিবলৈ দিয়ে। সেই কাম ওমৰে নিজেই কৰিছিল।
তদন্তকাৰী সূত্ৰটোৱে দাবী কৰিছে যে সমগ্ৰ বিষয়টো ছ’চিয়েল মিডিয়া ব্যৱহাৰ কৰি চলোৱা হয়। সেই যুৱক-যুৱতীসকলৰ মাজত সন্ত্ৰাসবাদ আৰু উগ্ৰবাদৰ বীজ সিঁচাৰ কাম নিপুণভাৱে কৰা হৈছিল। ওমৰৰ সংস্পৰ্শত থকা কেইবাজনো সন্দেহযুক্ত লোকৰ সন্ধান পোৱা গৈছে বুলি সূত্ৰটোৱে দাবী কৰিছে।
সূত্ৰ অনুসৰি, তেওঁলোকে মূলতঃ জম্মু-কাশ্মীৰৰ যুৱক-যুৱতীসকলক শ্লীপাৰ চেলত নিযুক্তি দিবলৈ বাছনি কৰিছিল। অৱশ্যে নিযুক্তিৰ কাম কেৱল জম্মু-কাশ্মীৰতে সীমাবদ্ধ নাছিল। দেশৰ অন্যান্য প্ৰান্ততো এই নেটৱৰ্ক বিয়পি পৰিছে।
হাৰিয়ানাত ‘ডাক্টৰ টেৰ’ৰ মডিউল’ৰ ইজনৰ পিছত সিজন সদস্যক গ্ৰেপ্তাৰ কৰাৰ লগে লগে সন্দেহ বৃদ্ধি পায়। তদন্তকাৰীৰ এক সূত্ৰই জনোৱা মতে, বিগত দুটা দশকৰ তুলনাত সন্ত্ৰাসবাদী গোটত নিযুক্তিৰ পদ্ধতি আৰু তাত কাক নিযুক্তি দিয়া হ’ব সেই কৌশলৰ আমূল পৰিৱৰ্তন হৈছে। সন্ত্ৰাসবাদী সংগঠনটোৰ হেণ্ডলাৰসকলে এতিয়া উচ্চ শিক্ষিত লোকক লক্ষ্য কৰি লৈছে।
আনকি পৰিয়ালত কোনো অপৰাধজনিত অভিলেখ নথকা যুৱক-যুৱতীকো লক্ষ্য কৰি লোৱা হৈছে। দিল্লী বিস্ফোৰণত অভিযুক্ত আটাইকেইজনেই চিকিৎসক। দেখা গৈছে যে তেওঁলোকৰ অধিকাংশৰে পূৰ্বৰ কোনো অপৰাধজনিত অভিলেখ নাই। তদন্তৰ এক সূত্ৰই জনোৱা মতে, চিকিৎসক আদিল ৰাথাৰ, মুজাফ্ফৰ ৰাথাৰ, মুজাম্মিল গনাইৰ অতীতত কোনো অপৰাধজনিত তথ্য নাছিল।
আনকি চিকিৎসক ওমৰ নবীৰো অতীতত কোনো অপৰাধজনিত অভিলেখ নাছিল। আৰক্ষী, চোৰাংচোৱা বা দেশৰ তদন্তকাৰী সংস্থাৰ দৃষ্টি যাতে সহজে এৰাই চলিব পাৰে তাৰ বাবে ‘হোৱাইট কলাৰ টেৰ’ৰ মডিউল’ সৃষ্টিৰ কাম চলি আছিল।
