কাজিৰঙা ৰাষ্ট্ৰীয় উদ্যান আৰু ব্যঘ্ৰ সংৰক্ষিত বনাঞ্চলৰ সঞ্চালক ড° সোণালী ঘোষে (Dr Sonali Ghosh) লাভ কৰিছে আন্তঃৰাষ্ট্ৰীয় বঁটা। এই খবৰৈ কাজিৰঙা আৰু বোকাখাতলৈ আনন্দৰ জোৱাৰ কঢ়িয়াই আনিছে।
ইউনাইটেড আৰব আমিৰেটৰ আবু ডাবিত চলি থকা আন্ত:ৰাষ্ট্ৰীয় সংগঠন আই ইউ চি এনৰ বিশ্ব সংৰক্ষন কংগ্ৰেছ – ২০২৫ ত আই ইউ চি এনে সংৰক্ষিত বনাঞ্চল পৰিচালনাৰ নতুন উদ্ভাৱনাৰ বাবে প্ৰদান কৰি অহা সন্মানীয় “কেনটন আৰ মিলাৰ বঁটা” প্ৰদান কৰিছে কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ ক্ষেত্ৰ সঞ্চালক ড৹ সোনালী ঘোষলৈ৷ আবু ডাবিৰ নেচনেল এক্সিবিচন চেন্টাৰত অনুষ্ঠিত বিশ্বৰ সংৰক্ষণ কংগ্ৰেছত ড৹ সোনালী ঘোষে এই সন্মানীয় বঁটা গ্ৰহন কৰি কাজিৰঙালৈ গৌৰৱ কঢ়িয়াই আনিবলৈ সক্ষম হৈছে ৷
ভাৰতীয় বন সেৱাৰ বিষয়া হিচাবে কাজিৰঙাতেই কৰ্ম জীৱনৰ পাতনি মেলা ড৹ সোনালী ঘোষ কাজিৰঙাৰ ১১৮ বছৰীয়া ইতিহাসত ক্ষেত্ৰ সঞ্চালক পদত অধিষ্ঠিত হোৱা প্ৰথম গৰাকী মহিলা বিষয়া। কাজিৰঙাৰ সঞ্চালক হিচাবে যোগদান কৰাৰ আগতে অসমৰ বন বিভাগৰ গৱেষণা, শিক্ষা আৰু কাৰ্য পৰিকল্পনাৰ মুখ্য বন সংৰক্ষক হিচাপে কাৰ্যনিৰ্বাহ কৰি আছিল ড৹ সোনালী ঘোষে ৷
অভিজ্ঞ আৰু অৰ্হতাসম্পন্ন ড৹ সোনালী ঘোষ মানাহ ৰাষ্ট্ৰীয় উদ্যানৰ ইণ্ডো-ভূটান লেণ্ডস্কেপত বাঘৰ বাবে বাসস্থানৰ উপযুক্ততা মূল্যাঙ্কন কৰাত গুৰুত্ব দি ৰিম’ট-চেঞ্চিং প্ৰযুক্তিত ডক্টৰেট ডিগ্ৰী লাভ কৰিছিল। সামৰিক বিষয়াৰ এটা পৰিয়ালত জন্ম গ্ৰহণ কৰা সোনালী ঘোষৰ শৈশৱৰে পৰাই বন আৰু বন্যপ্ৰাণী সংৰক্ষণৰ প্ৰতি আসক্তি আছিল ।
সোনালী ঘোষে ২০০২-০৩ বৰ্ষত ভাৰতীয় বন সেৱাত শীৰ্ষস্থান লাভ কৰি বন বিভাগত যোগদান কৰিছিল ৷ বন আৰু বন্যপ্ৰাণী বিজ্ঞানকে ধৰি একাধিক স্নাতকোত্তৰ ডিগ্ৰীৰ উপৰিও ভাৰতৰ সন্মানীয় ৰাষ্ট্ৰীয় আইন বিদ্যালয়ৰ পৰা পৰিৱেশ আইনত স্নাতকোত্তৰ ডিপ্লোমাও লাভ কৰিছিল ৷
কাজিৰঙা ৰাষ্ট্ৰীয় উদ্যানৰ সঞ্চালক ড৹ সোনালী ঘোষে ইউ চি এনৰ সন্মানীয় কেনটন আৰ মিলাৰ বঁটা লাভ কৰাৰ বাবে বৃহত্তৰ বোকাখাত অঞ্চলৰ বহু ব্যক্তি, দল-সংগঠনে ড° ঘোষলৈ অভিনন্দন জ্ঞাপন কৰিছে।
