জন্মদিনত নৰেন্দ্ৰ মোদীৰ (PM Modi) মুখত পুনৰ ‘অপাৰেচন সিন্দুৰ’ৰ প্ৰসংগ। ভাৰতীয় সেনাৰ এই অভিযানক প্ৰশংসা কৰি প্ৰধানমন্ত্ৰীয়ে কয়, “নতুন ভাৰতে এতিয়া পাৰমাণৱিক ভাবুকিক ভয় নকৰে।”
বুধবাৰে প্ৰধানমন্ত্ৰী মোদীয়ে ৭৫ বছৰ সম্পূৰ্ণ কৰিলে। আজিৰ দিনটোতে তেওঁ মধ্যপ্ৰদেশত এখন ৰাজহুৱা সভা অনুষ্ঠিত কৰে।
তাত তেওঁ কয়, “জৈছ-ই মহম্মদ’’-এ স্বীকাৰ কৰিছে যে ভাৰতীয় সেনাই সিন্দুৰ অভিযানত তেওঁলোকৰ ঘাটি ধ্বংস কৰিছিল। সন্ত্ৰাসবাদী সংগঠনটোৰ এজন নেতাই স্বীকাৰ কৰিছে যে ভাৰতীয় সেনাই জৈছ প্ৰধান মাছুদ আজহাৰৰ পৰিয়ালক হত্যা কৰিছিল। মোদীয়ে কয়, “জৈছে ইছলামাবাদৰ প্ৰকৃত চৰিত্ৰ উদঙাই দিছে।”
পাকিস্তান সেনা প্ৰধান আচিম মুনিৰে অপাৰেচন সিন্দুৰৰ পিছত পাৰমাণৱিক আক্ৰমণৰ ভাবুকি দিয়াৰ অভিযোগ। এই সন্দৰ্ভত মোদীয়ে কয়, “এয়া নতুন ভাৰত। আমি কাকো ভয় নকৰো। আমি ঘৰত প্ৰৱেশ কৰি শত্ৰুক ধ্বংস কৰিব পাৰো।”
উল্লেখযোগ্য যে জম্মু-কাশ্মীৰৰ পহেলগামত সংঘটিত সন্ত্ৰাসবাদী আক্ৰমণত ২৬ জন লোক নিহত হয়। ইয়াৰ পিছত ভাৰতীয় সেনাই পাকিস্তান আৰু পাকিস্তান অধীকৃত কাশ্মীৰৰ ৯টা সন্ত্ৰাসবাদী শিবিৰ ধ্বংস কৰে। এই প্রতিশোধমূলক কার্যৰ পাছত পাকিস্তানে ভাৰতৰ সীমান্তত আক্রমণ কৰাৰ চেষ্টা চলাইছিল৷
অৱশ্যে ভাৰত চৰকাৰে পাকিস্তানৰ আক্ৰমণক প্ৰতিহত কৰি প্ৰতি আক্ৰমণ কৰা বুলি কয়। ইয়াৰ ফলত পাকিস্তানী সেনাৰ বিভিন্ন ঘাটিৰো ক্ষতিসাধন হয়। তিনিদিনীয়া আক্ৰমণ আৰু প্ৰত্যাক্ৰমণৰ অন্তত দুয়োখন দেশে যুদ্ধবিৰতিৰ বাবে সন্মতি প্ৰকাশ কৰে।
