হিমালয় অঞ্চলৰ (Himalayan State) ৪০০ৰো অধিক হিমবাহ হ্ৰদৰ আকাৰ বিপজ্জনকভাৱে বৃদ্ধি পাইছে। ফলত দেশত দুৰ্যোগৰ আশংকাও বাঢ়িছে। শেহতীয়াকৈ কেন্দ্ৰীয় জল আয়োগৰ এক প্ৰতিবেদনত এই কথা উল্লেখ কৰা হৈছে। একে সময়তে আয়োগে কয় যে এই হ্ৰদসমূহৰ ওপৰত নিৰন্তৰ নিৰীক্ষণৰ প্ৰয়োজনীয়তা আছে।
শেহতীয়াকৈ জুন মাহত প্ৰকাশ পাইছিল হিমবাহ হ্ৰদ আৰু জলপৃষ্ঠৰ মাহেকীয়া প্ৰতিবেদন।
সেই প্ৰতিবেদনৰ ভিত্তিত কেন্দ্ৰীয় জল আয়োগে কয় যে এই বিলসমূহ লাডাখ, জম্মু-কাশ্মীৰ, হিমাচল প্ৰদেশ, উত্তৰাখণ্ড, ছিকিম, অৰুণাচল প্ৰদেশত বিয়পি আছে। হিমবাহ হ্ৰদ এটলাছ ২০২৩ অনুসৰি ৬৮১ টা হিমবাহৰ হ্ৰদৰ ভিতৰত ৪৩২ টা ভাৰতত আছে। সেই হ্ৰদবোৰৰ আকাৰ বাঢ়িছে। ফলত হিমালয় অঞ্চলৰ ৰাজ্যসমূহত বিপদৰ আশংকা বৃদ্ধি পাইছে।
কেন্দ্ৰীয় জল আয়োগৰ প্ৰতিবেদনত কোৱা হৈছে যে ২০১১ চনৰ পৰা ২০২৫ চনৰ জুন মাহৰ ভিতৰত দেশৰ হিমবাহৰ হ্ৰদৰ মুঠ আয়তন ৩০ শতাংশ বৃদ্ধি পাইছে। ১৯১৭ হেক্টৰৰ পৰা ২৫০৮ হেক্টৰলৈ বৃদ্ধি পাইছে। প্ৰতিবেদনত কোৱা হৈছে যে অৰুণাচল প্ৰদেশত ১৯৭টা এনে হ্ৰদ আছে।
লাডাখত ১২০ টা, জম্মু-কাশ্মীৰত ৫৭ টা, ছিকিমত ৪৭ টা, হিমাচল প্ৰদেশত ৬ টা আৰু উত্তৰাখণ্ডত ৫ টা আছে। মুঠতে চলিত বৰ্ষৰ জুন মাহৰ ভিতৰত হিমালয় অঞ্চলৰ ১৪৩৫টা হিমবাহ হ্ৰদৰ আকাৰ বৃদ্ধি পাইছে।
হ্ৰদৰ আকাৰ বৃদ্ধি পোৱাৰ লগে লগে বিপদৰ সম্ভাৱনাও ভয়ংকৰভাৱে বৃদ্ধি পাইছে।
সেয়েহে কেন্দ্ৰীয় জল আয়োগে এই হ্ৰদসমূহৰ পৰ্যবেক্ষণৰ বাবে বিশেষ ব্যৱস্থাৰ প্ৰয়োজন বুলি প্ৰস্তাৱ আগবঢ়াইছে। এনে ব্যৱস্থাও গঢ়ি তুলিব লাগে যাতে বিপদ ওচৰ চাপি অহা যেন অনুভৱ হ’লে আগতীয়াকৈ সতৰ্কবাণী দিব পৰা যায়, যাতে নিম্নভূমিৰ বাসিন্দাসকলক দুৰ্যোগৰ পৰা ৰক্ষা কৰিব পাৰি।
উল্লেখ্য যে বিগত কেইবছৰমানৰ পৰা হিমালয়ৰ ৰাজ্যসমূহৰ দুৰ্যোগৰ ছবিখন যথেষ্ট সলনি হৈছে। সঘনাই ডাৱৰ বিস্ফোৰণ, ভূমিস্খলনৰ বাবে হিমাচল প্ৰদেশ, ছিকিম, উত্তৰাখণ্ডৰ দৰে ৰাজ্য বিধ্বস্ত হৈ পৰিছে।
পাহাৰৰ ঢালৰ পৰা নামি অহা ঢলে উত্তৰাখণ্ডৰ উত্তৰকাশীৰ ধৰালীত শেহতীয়াকৈ যি ভয়ানক দুৰ্যোগৰ সৃষ্টি কৰিছিল, সেই ভয়ানক দুৰ্যোগৰ কাৰণ ডাৱৰ বিস্ফোৰণ। কিন্তু পুনৰ তথ্য পোহৰলৈ আহিছে যে এই আকস্মিক বানৰ সৃষ্টি হৈছে হিমবাহ গঠিত হ্ৰদৰ বিস্ফোৰণৰ ফলত। ২০১৩ চনত কেদাৰনাথত ঘটাৰ দৰে ঘটিছিল।
