অচিনাকি পথত গুগল মেপৰ ওপৰত নিৰ্ভৰ কৰিছিল গাড়ীৰ চালকে। কিন্তু গুগল মেপৰ (Google Map) নিৰ্দেশনা পালন কৰি বিপদত পৰে এগৰাকী মহিলা চালক।
এইবাৰ এই ঘটনা সংঘটিত হৈছে নৱী মুম্বাইত। শুকুৰবাৰে পুৱা তেওঁৰ গাড়ীখন পোনে পোনে গৈ খাৱৈত সোমায়। ঘটনাটো উপকূল ৰক্ষী বাহিনীৰ দৃষ্টিগোচৰ হোৱাত ততাতৈয়াকৈ মহিলাগৰাকীক উদ্ধাৰ কৰে। গাড়ীখনো ক্ৰেনেৰে খাৱৈৰ পৰা উলিয়াই অনা হয়। এই ভিডিঅ’ ছ’চিয়েল মিডিয়াত ভাইৰেল হৈছে।
মহিলাগৰাকীয়ে কয় যে তেওঁ মহাৰাষ্ট্ৰৰ বেলাপুৰৰ পৰা উলৱেলৈ গৈ আছিল। তেওঁ গুগল মেপ ব্যৱহাৰ কৰি গাড়ী চলাইছিল। বাটত তেওঁ বেলাপুৰ দলংখন লোৱাৰ কথা আছিল। মহিলাগৰাকীয়ে কয় যে দলংখন লোৱাৰ পৰিৱৰ্তে গুগল মেপে কাষতে ৰাস্তা এটা ল’বলৈ নিৰ্দেশ দিছিল।
সেই নিৰ্দেশনা অনুসৰণ কৰি গৈ তেওঁৰ গাড়ীখন দলঙৰ কাষৰ ৰাস্তাৰ কাষৰ খাৱৈত পৰে। ঘটনাটো তাত উপস্থিত উপকূল ৰক্ষীৰ চকুত পৰে। খৰধৰকৈ তেওঁলোকে মহিলাগৰাকীক খাৱৈৰ পৰা উদ্ধাৰ কৰে। গাড়ীখন তুলিবলৈ ক্ৰেন এখন অনা হয়।
উল্লেখযোগ্য যে যোৱা বছৰৰ নৱেম্বৰ মাহত উত্তৰ প্ৰদেশত বিয়াৰ পৰা উভতি আহিছিল তিনিজন বন্ধু। নিশাৰ আন্ধাৰত নিৰ্মীয়মান এখন দলঙৰ পৰা ২০ ফুট তলত এখন তীব্ৰবেগী গাড়ী বাগৰি পৰে। ফলত তিনিওজন যাত্ৰীৰ মৃত্যু হয়।
তিনিওজনেই উত্তৰ প্ৰদেশৰ মইনপুৰী আৰু ফাৰুখাবাদৰ বাসিন্দা আছিল। তাৰ পূৰ্বে যোৱা বছৰৰ জুন মাহত কেৰালাৰ কাছাৰগোডত আন এখন গাড়ী নদীত পৰি যায়। সৌভাগ্যক্ৰমে নদীত কিছু দূৰ গৈ গাড়ীখন গছৰ ডালত আবদ্ধ হৈ পৰে। কেনেবাকৈ যাত্ৰী দুজনৰ প্ৰাণ ৰক্ষা পৰে।
