কাজিৰঙাত (Kaziranga) সন্ধান পোৱা গৈছে এক বিপন্নপ্ৰায় ‘ৰাং কুকুৰ’ৰ অৱস্থিতি৷ এটা গৱেষকৰ দলৰ গৱেষণামূলক অধ্যয়নত এই ৰাং কুকুৰৰ বিৰল প্ৰজাতিটোৰ উপস্থিতি কেমেৰা ট্ৰেপিঙত ধৰা পৰিছে৷ এই বিষয়ে জনাইছে কাজিৰঙা ৰাষ্ট্ৰীয় উদ্যান তথা ব্যাঘ্ৰ সংৰক্ষিত বনাঞ্চলৰ সঞ্চালক ডঃ সোণালী ঘোষে।
তেওঁ প্ৰদান কৰা তথ্য অনুসৰি এই ৰাং কুকুৰ প্ৰজাতিটো Dhole Cuon Alpinus নামে জনাজাত। আনহাতে, কাজিৰঙাত ৰাং কুকুৰৰ উপস্থিতিৰ বিষয়ে নিশ্চিত কৰা গৱেষকৰ দলটোৱে এই বিষয়ে Journal of Threatened Taxa শীৰ্ষক এখন গ্ৰন্থত প্ৰকাশ কৰিছে ৷
আনহাতে, এই সন্দৰ্ভত কাজিৰঙাৰ ডি এফ অ’ অৰুণ ভিগনেছে জনাইছে যে কাজিৰঙা-কাৰ্বি আংলং ভূখণ্ডত কেমেৰাত আবদ্ধ হোৱা প্ৰজাতিটো এক প্ৰকাৰৰ ৱাইল্ড ডগ । ইয়াক স্থানীয়ভাৱে ৰাং কুকুৰ বুলি কোৱা হয় আৰু সৰ্বভাৰতীয় পৰ্যায়ত ইয়াক ঢ’ল বুলি কোৱা হয়৷
ৰাং কুকুৰৰ এটা প্ৰজাতি এছিয়াত আৰু আন এটা প্ৰজাতি আফ্ৰিকাত পোৱা যায়বুলি উল্লেখ কৰি তেওঁ লগতে কয় যে এইটো এটা বিপন্নপ্ৰায় প্ৰজাতি৷ ইফালে কাজিৰঙাত কেমেৰাত বন্দী হোৱা এই ৰাং কুকুৰৰ ফটো ইতিমধ্যে মুখ্যমন্ত্ৰী ডঃ হিমন্ত বিশ্ব শৰ্মায়ো নিজৰ সামাজিক মাধ্যমত প্ৰকাশ কৰিছে৷
ফেচবুকত ইয়াৰে এখন ফটো শ্বেয়াৰ কৰি মুখ্যমন্ত্ৰীয়ে লিখিছে, “কাজিৰঙা-কাৰ্বি আংলং এলেকাত কেমেৰাত উপস্থিতি ধৰা পৰা Cuon alpinus বৈজ্ঞানিক নামৰ জন্তুবিধৰ আমাৰ বাবে চিনাকি নামটি হৈছে ৰাংকুকুুৰ৷ নিজৰ ওজনতকৈ ৮ গুণ বেছি ওজনৰ প্ৰাণীকো চিকাৰ কৰাত সিদ্ধহস্ত ৰাংকুকুৰ উপস্থিতি অসমৰ সম্পূৰ্ণ জৈৱ-বৈচিত্ৰ্যৰ এক উৎকৃষ্ট নিদৰ্শন৷”
তেওঁ লগতে লিখিছে, “প্ৰতিটো বৈজ্ঞানিক অগ্ৰগতিৰ আঁৰত বছৰ বছৰ ধৰি কৰা কঠোৰ পৰিশ্ৰম বৈজ্ঞানিক অধ্যয়নসমূহ প্ৰায় মাহৰ পাছত মাহ, আনকি বছৰ বছৰ ধৰি চলি থাকে৷
তাৰ পাছত আমি ইয়াৰ ফলাফল সম্পৰ্কে অৱগত হওঁ। এই যাত্ৰা অগণন ঘণ্টাৰ গৱেষণা, পৰীক্ষা-নিৰীক্ষা, বিপৰ্যয় আৰু অধ্যৱসায়েৰে ভৰি আছে। প্ৰায় তিনি বছৰ অধ্যয়ন কৰা গৱেষকসকলে এতিয়াহে বৈজ্ঞানিক গৱেষণা পত্ৰখন বিশ্লেষণ কৰি কৰিছে৷ আটাইলৈ অভিনন্দন৷”
