পাকিস্তানৰ যিকোনো প্ৰতিশোধৰ প্ৰতি ভাৰতে তীব্ৰ সঁহাৰি দিব। এই কথা সদৰী কৰিছে বৈদেশিক মন্ত্ৰী এছ জয়শংকৰে (S Jaishankar)। বৃহস্পতিবাৰে তেওঁ আমেৰিকাৰ বিদেশ মন্ত্ৰী মাৰ্কো ৰুবিঅ’ৰ সৈতে ফোনযোগে কথা পাতে। তেওঁ ইটালীৰ বৈদেশিক মন্ত্ৰী এণ্টনিঅ’ তাজানী আৰু ইউৰোপীয় সংঘৰ বৈদেশিক পৰিক্ৰমাৰ উচ্চ প্ৰতিনিধি কাজা কালাছৰ সৈতেও কথা পাতে।
তিনিওৰে লগত হোৱা আলোচনাৰ অন্তত জয়শংকৰে ছ’চিয়েল মিডিয়াত পোষ্ট কৰে। ৰুবিঅ’ৰ সৈতে হোৱা আলোচনা সন্দৰ্ভত তেওঁ লিখিছে, “আজি সন্ধিয়া আমেৰিকাৰ বিদেশ মন্ত্ৰী মাৰ্কো ৰুবিঅ’ৰ সৈতে কথা পাতিলোঁ। সন্ত্ৰাসবাদৰ বিৰুদ্ধে ভাৰতৰ সৈতে কাম কৰিবলৈ আমেৰিকাৰ ইচ্ছাক মই শলাগ লৈছো। সন্ত্ৰাসবাদৰ প্ৰতি ভাৰতৰ সঁহাৰি আৰু পৰিমিত প্ৰতিক্ৰিয়াৰ ওপৰত গুৰুত্ব আৰোপ কৰা হৈছে। প্ৰতিশোধৰ যিকোনো প্ৰচেষ্টাক গুৰুতৰভাৱে দমন কৰা হ’ব।”
ইয়াৰ পিছতে ভাৰতৰ বৈদেশিক মন্ত্ৰীয়ে ইউৰোপীয় সংঘৰ সৈতে কথা পাতে। তেওঁৰ পোষ্ট অনুসৰি, “ইউৰোপীয় সংঘৰ এইচ আৰ ভি পি কাজা কালাছৰ সৈতে শেহতীয়া পৰিস্থিতিৰ বিষয়ে আলোচনা কৰোঁ। ভাৰতে যি কৰিছে সেয়া সামান্য। কিন্তু যিকোনো প্ৰতিশোধৰ ক্ষেত্ৰত কঠোৰ সঁহাৰি দিয়া হ’ব।”
জয়শংকৰে ইটালীৰ বৈদেশিক মন্ত্ৰীলৈও একেই বাৰ্তা প্ৰেৰণ কৰে। তেওঁ ছ’চিয়েল মিডিয়াত লিখিছে, “ইটালীৰ বৈদেশিক মন্ত্ৰী এণ্টনিঅ’ তাজানীৰ সৈতে কথা পাতিছো। সন্ত্ৰাসবাদৰ প্ৰতি ভাৰতৰ পৰিমিত সঁহাৰিৰ বিষয়ে আমি আলোচনা কৰোঁ। যিকোনো প্ৰতিশোধৰ ক্ষেত্ৰত তীব্ৰ সঁহাৰি দিয়া হ’ব।”
