এটি নাবালকক লৈ মেলালৈ গৈ আছিল এজন যুৱক। হঠাৎ একাংশ লোকে দুয়োকে ধৰি মাৰপিট কৰিবলৈ ধৰে। অভিযোগ অনুসৰি, দুয়োকে বিদ্যুতৰ খুঁটাত বান্ধি প্ৰস্ৰাৱো খুৱাই দিয়ে। কেৱল সেয়াই নহয়, চিগাৰেট হুপিবলৈও দিয়া হয়। কিন্তু কিয়? তেওঁলোকৰ অপৰাধ কি?
পিছে ঘটনা অন্য ধৰণৰহে। কেৰ্কেটুৱাই তামোল খায়, নেউলক ধৰি-বান্ধি কোবাইৰ নিচিনা ঘটনা। আচলতে যিসকল লোকে তেওঁলোকক নিগ্ৰহ কৰিছিল, ভুলতেহে সেয়া কৰিছিল। নিগ্ৰহকাৰীয়ে আচলতে বিচাৰি আছিল বেলেগক, ধৰি নি অত্যাচাৰ কৰিলে অন্য দুজনকহে। ভুলবশতঃ পথৰ পৰা উঠাই নিছিল নিৰ্দোষী দুজনক।
ওড়িশাৰ পুৰী জিলাৰ কাটাকোছাংগা অঞ্চলৰ এই ঘটনাই চাঞ্চল্যৰ সৃষ্টি কৰিছে। জানিব পৰা মতে, অঞ্চলটোৰ চুবুৰীয়া দুখন গাঁৱৰ বাসিন্দাৰ মাজত বিবাদৰ সৃষ্টি হয়। ঘটনাৰ দিনা কাটাকোছাংগা গাঁৱৰ ৰাইজে ভাবিছিল যে নিগৃহীত দুজন আচলতে চুবুৰীয়া গাঁৱৰ প্ৰতিদ্বন্দ্বী গোটৰ সদস্য।
সেইবাবেই তেওঁলোকক মাৰপিট কৰিবলৈ ধৰে। ইফালে প্ৰহাৰৰ পিছতে এজনে মূৰত গুৰুতৰভাৱে আঘাত পায়।
এই কাণ্ডৰ ভয়াৱহতা বৰ্ণনা কৰি এজন ভুক্তভোগীয়ে কয়, “আমি মেলালৈ গৈ আছিলোঁ। কিন্তু আমি গম পোৱাৰ পূৰ্বেই দুজনমানে আহি আমাক ধৰে। তাৰ পিছত আমাক বিদ্যুতৰ খুঁটাত বান্ধি মাৰপিট আৰু অত্যাচাৰ কৰা হয়।”
এই ঘটনাৰ পিছতে নাবালকৰ পিতৃয়ে দোষীক কঠোৰ শাস্তি প্ৰদানৰ দাবী কৰিছে। সমগ্ৰ ঘটনাৰ বিষয়ে জানিব পাৰি আৰক্ষীয়েও ব্যৱস্থা গ্ৰহণ কৰিছে। এজন আৰক্ষী বিষয়াই কয় যে কোনো অপৰাধীক ৰেহাই দিয়া নহ’ব। আৰক্ষীৰ সূত্ৰ অনুসৰি, আৰক্ষীয়ে ইতিমধ্যে কেইবাজনো সন্দেহযুক্ত লোকক আটক কৰি জেৰা কৰিছে।
