ৰঙালী বিহুৰ প্ৰাকক্ষণত কাৰবি আংলং জিলাৰ অসম -নাগালেণ্ড সীমান্তৰ লাহৰিজানত পুৱতি নিশা প্ৰায় ৩ বাজি ২১ মিনিটত আৰক্ষীৰ নিয়মীয়া নাকা তালাচীৰ সময়ত এটা কেএফ পইণ্ট 7 পইণ্ট 65 পিষ্টল আৰু ৫ জাঁই সজীৱ গুলী আৰু মেগজিন সহ আৰক্ষীৰ জালত পৰে ৪ জন যুৱক ৷
ধৃত যুৱক কেইজন ক্ৰমে, নাগালেণ্ড মন জিলাৰ তামকোৰ একছনৰ পুত্ৰ পুংবা, ফেক জিলাৰ খুজা নিৱাসী জালি খাকোৰ পুত্ৰ নুতো ৰাখি , ফেক জিলাৰ ডেজেখাৰ নিবাসী ইয়েভি নিখাৰ পুত্ৰ টিচেডি নিখা আৰু ফেক জিলাৰ খুজা নিৱাসী চিখুবে ৰাখোৰ পুত্ৰ কুজ’ট ৰাখো বুলি চিনাক্ত কৰা হৈছে ৷ ঘটনা স্থলীতে আৰক্ষীয়ে সোধ পোছ কৰাৰ সময়ত লোক কেইজনে পিষ্টল, গুলী আৰু মেগজিনৰ কোনো বৈধ তথ্য প্ৰদৰ্শন কৰিবলৈ সক্ষম নহ’ল ৷
সেয়ে আৰক্ষীয় ঘটনা স্থলীৰ পৰা নিৰপেক্ষ সাক্ষীগণৰ সাক্ষাতে উদ্ধাৰ হোৱা পিষ্টল, গুলী আৰু মেগজিন জব্দ কৰাৰ লগতে এই সন্দৰ্ভত এক গোছৰ ৰুজো দি তদন্ত অব্যাহত ৰাখিছে বুলি জানিব পৰা গৈছে ৷
