মহাকাশচাৰী (Astronauts) সুনীতা উইলিয়ামছে (Sunita Williams) ভাৰতলৈ আহিব বিচাৰিছে (Wants to come to India)। এই কথা ভাৰতীয় মূলৰ নাছা মহাকাশচাৰীগৰাকীয়ে পৃথিৱীলৈ উভতি অহাৰ পাছত প্ৰথমবাৰৰ বাবে সংবাদ মাধ্যমৰ আগত প্ৰকাশ কৰে। তেওঁৰ পূৰ্বপুৰুষৰ ঘৰ গুজৰাটত। এতিয়াও তেওঁৰ আত্মীয় মহেছানা জিলাৰ ঝুলাছান গাঁৱত থাকে। মহাকাশত ২৮৬ দিন কটাই অহা সুনীতাক ভাৰতলৈ আহিবলৈ আমন্ত্ৰণ জনাইছে প্ৰধানমন্ত্ৰী নৰেন্দ্ৰ মোদীয়ে। এইবাৰ সুনীতায়ো ভাৰত ভ্ৰমণৰ আগ্ৰহ প্ৰকাশ কৰে। ভাৰতীয় মহাকাশ গৱেষণা কেন্দ্ৰ ইছৰোৰ মহাকাশ গৱেষণা দল (ISRO Space Research Team)ক লগ কৰিবলৈও তেওঁ আগ্ৰহী।
সুনীতাৰ পিতৃ দীপক পাণ্ডিয়াৰ জন্ম হৈছিল গুজৰাটত। তেওঁৰ মাতৃ উৰ্চুলিন বনি পাণ্ডিয়া শ্লোভাক-আমেৰিকান। পৃথিৱীলৈ ঘূৰি অহাৰ পিছৰে পৰা সুনীতা আৰু তেওঁৰ সতীৰ্থ মহাকাশচাৰী বুচ উইলম’ৰ নাছাৰ তত্ত্বাৱধানত আছে। মহাকাশচাৰীসকল মহাকাশৰ পৰা উভতি অহাৰ পিছত বহু শাৰীৰিক সমস্যাৰ সন্মুখীন হ’বলগীয়া হয়। মাধ্যাকৰ্ষণৰ লগত পুনৰ খাপ খুৱাবলৈও কিছু সময় লাগে।
গতিকে নাছাৰ ক্ৰু কোৱাৰ্টাৰত তেওঁলোকৰ চিকিৎসা আৰু অন্যান্য শাৰীৰিক পৰীক্ষা কৰা হয়। ইফালে ভাৰতীয় সময় অনুসৰি মঙলবাৰে প্ৰথমবাৰৰ বাবে সংবাদ মাধ্যমৰ মুখামুখি হয় সুনীতা। ভাৰতলৈ অহাৰ সন্দৰ্ভত সুনীতাই কয়, “মোৰ আশা আৰু মই নিশ্চিতভাৱে জানো যে মই মোৰ দেউতাৰ দেশলৈ গৈ তাত থকা লোকসকলক লগ পাম। মই ইছৰোৰ পৰৱৰ্তী অভিযানত কাম কৰা ভাৰতীয় মহাকাশ গৱেষকসকলক লগ পাবলৈ আগ্ৰহী।”
ইছৰোৰ মহাকাশ গৱেষকসকলক লগ পাবলৈ তেওঁ যথেষ্ট আগ্ৰহী বুলি জনায়। আন্তঃৰাষ্ট্ৰীয় মহাকাশ কেন্দ্ৰত প্ৰায় ৯ মাহ কটোৱাৰ পিছত সুনীতাই পৃথিৱীলৈ উভতি আহে। মহাকাশৰ অভিজ্ঞতা তেওঁ ইছৰোৰ দলৰ সৈতে ভাগ-বতৰা কৰিব বিচাৰিছে। ভাৰতীয় মূলৰ নাছাৰ মহাকাশচাৰীগৰাকীয়ে কয়, “মই আশা কৰিছোঁ যে কোনো এটা সময়ত তেওঁলোকক (ইছৰোৰ প্ৰতিনিধিসকলক) লগ পাম আৰু যিমান পাৰি ভাৰতৰ সৈতে মোৰ অভিজ্ঞতা ভাগ-বতৰা কৰিম।”
যোৱা বছৰৰ ৫ জুনত মহাকাশলৈ গৈছিল সুনীতা। আন্তঃৰাষ্ট্ৰীয় মহাকাশ কেন্দ্ৰত আঠ দিন কটাই পৃথিৱীলৈ উভতি অহাৰ কথা আছিল। কিন্তু যিখন বিমানত তেওঁলোক গৈছিল, সেইখন বয়িং ষ্টাৰলাইনাৰৰ যান্ত্ৰিক ত্ৰুটি আছিল। ফলত আঠদিনীয়া ভ্ৰমণ ২৮৬ দিনলৈ সলনি কৰা হয়। অৱশেষত ভাৰতীয় সময় অনুসৰি ১৯ মাৰ্চৰ পুৱাৰ ভাগত সুনীতা আৰু বুচ পৃথিৱীলৈ উভতি আহে।
