সাক্ষীৰ বয়সৰ কোনো নূন্যতম সীমা নাই। শিশুৰ সাক্ষ্যও আন যিকোনো সাক্ষীৰ দৰেই গুৰুত্বপূৰ্ণ। কিন্তু শিশুটি সাক্ষ্য দিবলৈ যোগ্য হয়নে নহয় সেই কথা মনত ৰাখিব লাগিব। যদি হয়, তেন্তে যিকোনো বয়সতে সাক্ষ্য দিব পাৰিব আৰু ই গ্ৰহণযোগ্য। এক হত্যাকাণ্ডৰ গোচৰৰ শুনানিৰ সময়ত উচ্চতম ন্যায়ালয়ৰ (Supreme Court of India) এই পৰ্যবেক্ষণ।
এজন লোকে পত্নীক হত্যা কৰাৰ অভিযোগৰ গোচৰত মধ্যপ্ৰদেশ উচ্চ ন্যায়ালয়ে দম্পতীহালৰ সাত বছৰীয়া কন্যাৰ সাক্ষ্য মানি লোৱা নাছিল।
আদালতে অভিযুক্তক দোষমুক্ত কৰে। ইয়াৰ পিছত উচ্চতম ন্যায়ালয়ত গোচৰটো দাখিল কৰা হয়। ন্যায়াধীশ জে বি পাৰ্দিৱালা আৰু ন্যায়াধীশ মনোজ মিশ্ৰৰ বিচাৰপীঠে মধ্যপ্ৰদেশ উচ্চ ন্যায়ালয়ৰ ৰায় বাতিল কৰে। উচ্চতম ন্যায়ালয়ৰ মতে, ভাৰতীয় প্ৰমাণ আইনত সাক্ষীৰ কোনো নিৰ্ধাৰিত বয়স নাই।
সেয়েহে যদি কোনো শিশু সাক্ষী হয়, তেন্তে তেওঁৰ সাক্ষ্য নাকচ কৰিব নোৱাৰি।
বিচাৰৰ সময়ত দাবী কৰা হৈছিল যে হত্যাকাণ্ড সংঘটিত হোৱাৰ সময়ত দম্পতীহালৰ সাত বছৰীয়া কন্যা ঘৰতে আছিল। তেওঁ চকুৰ সন্মুখতে মাকক হত্যা কৰা দেখিছিল।
উচ্চতম ন্যায়ালয়ৰ পৰ্যবেক্ষণ, বহু ক্ষেত্ৰত আদালতে শিশুৰ সাক্ষ্য নাকচ কৰে। কাৰণ শিশুসকল সহজেই প্ৰভাৱিত হয়। গতিকে এটা শিশুৰ সাক্ষ্য গ্ৰহণৰ ক্ষেত্ৰত আদালত সাৱধান হ’ব লাগিব। লগতে উচ্চতম ন্যায়ালয়ে কয় যে শিশুটিয়ে কাৰোবাৰ প্ৰভাৱত সাক্ষ্য দিছে নেকি সেয়াও চাব লাগে।
ন্যায়াধীশ পাৰ্দিৱালাৰ বিচাৰপীঠৰ মতে, আদালতে যদি বিচাৰি পায় যে শিশুৱে কোনো প্ৰভাৱ নোহোৱাকৈ সাক্ষ্য দিছে, তেন্তে অভিযুক্তৰ দোষী বা নিৰ্দোষিতা প্ৰমাণ কৰাত ই নিশ্চয় উপযোগী হ’ব।
উল্লেখযোগ্য যে উচ্চতম ন্যায়ালয়ে মধ্যপ্ৰদেশ উচ্চ ন্যায়ালয়ৰ ৰায় খাৰিজ কৰি হত্যাকাণ্ডৰ গোচৰত অভিযুক্তক দোষী সাব্যস্ত কৰে। তেওঁক যাৱজ্জীৱন কাৰাদণ্ডৰ শাস্তি প্ৰদান কৰা হয়।
