৫১ সংখ্যক কাৰবি যুৱ মহোৎসৱত অপ্ৰতিকৰ ঘটনা সংঘটিত হোৱাৰ বাতৰি পোহৰলৈ আহিছে ৷ আজি পৱতি নিশা ২ বজাত সংঘটিত হয় উক্ত ঘটনা ৷ বৃহস্পতিবাৰে পুৱা ঘটনাস্থলী পৰিদৰ্শন কৰি কাৰবি আংলং জিলা আৰক্ষী অধীক্ষক সঞ্জীৱ কুমাৰ শইকীয়াই সাংবাদিকৰ সৈতে বাৰ্তালাপত এই কথা জানিবলৈ দিয়ে ৷
আনহাতে মধ্য সংমণ্ডলৰ আইজিপি শিৱ প্ৰসাদ গাঞ্জেলাও ঘটনাস্থলী পৰিদৰ্শন কৰে ৷প্ৰাপ্ত খবৰ অনুসৰি তাৰালাংচ ৫১ সংখ্যক যুৱ মহোৎসৱ টয়টা গাড়ীৰ অস্হায়ী শ্বৰোমত হোৱা দুৰ্ঘটনাক কেন্দ্ৰ কৰি উত্তপ্ত হ’ল পৰিস্থিতি ৷
KCS ৰ ভলন্টিয়াৰ সকলে উগ্ৰ যুৱক সকলক বুজুৱাৰ চেষ্টা কৰি ব্যৰ্থ হ’লত আৰক্ষী আহে ৷ উগ্ৰ যুৱক সকলে আৰক্ষীৰ লগতো খণ্ডযুদ্ধত লিপ্ত হয় ৷ইয়াৰ পিছতে যুৱকৰ দলটোৱে তাৰালাংচ’ৰ মূল স্হানৰ পৰা আতৰি গৈ বাহিৰত APDCL ৰ গাড়ী জ্বলাই দিয়ে ৷ সেই গাড়ীৰ জুই নিৰ্বাপনৰ বাবে অহা অগ্নি নিবাপক বাহিনীৰ দুখন গাড়ী আৰু আৰক্ষীৰ গাড়ীতো আক্ৰমণ কৰে ৷বাধ্য হৈ আৰক্ষীয়ে শূনলৈ গুলী চালনা কৰিব লগা হয় ৷
কাৰবি যুৱ মহোৎসৱলৈ অহা লোকৰো কেইবাখনো গাড়ী শিলাবৰ্ষনত ক্ষতিগ্ৰস্ত হয় ৷ উক্ত ঘটনাত কেইবাগৰাকী আৰক্ষী জোৱান উগ্ৰ যুৱক সকলৰ শিলা বৰ্ষণত আহত হয় বুলি জানিব পৰা গৈছে ৷
