শনিবাৰে কেন্দ্ৰীয় বিত্তমন্ত্ৰী নিৰ্মলা সীতাৰমনে দাখিল কৰে ২০২৫-২৬ বিত্তীয় বৰ্ষৰ বাবে পূৰ্ণাংগ বাজেট (Budget 2025)। এই বাজেটত কেইবাটাও নতুন দিশৰ সূচনা কৰা হৈছে। আনহাতে, মোদী চৰকাৰৰ তৃতীয় কাৰ্যকালৰ প্ৰথমখন পূৰ্ণাংগ বাজেটত অসমৰ বাবেও বিশেষ ঘোষণা কৰা হৈছে।
বাজেটত নামৰূপত এটা ইউৰিয়া প্ৰকল্প স্থাপনৰ কথা ঘোষণা কৰা হৈছে। ইয়াৰ উৎপাদন ক্ষমতা হ’ব ১২.৭ লাখ মেট্ৰিক টন।
আনহাতে, অসমৰ মুখ্যমন্ত্ৰী ডঃ হিমন্ত বিশ্ব শৰ্মাই এই প্ৰকল্পৰ বাবে কেন্দ্ৰীয় চৰকাৰক ধন্যবাদ জনায়। তেওঁ সামাজিক মাধ্যমৰ এটা পোষ্টত লিখিছে, “অসমৰ বাবে আজি এক ঐতিহাসিক দিন! কেন্দ্ৰীয় বাজেট-২০২৫ত আমাৰ নামৰূপত ১২.৭ লাখ মেট্ৰিক টন উৎপাদন ক্ষমতাৰ ইউৰিয়া প্ৰকল্পৰ ঘোষণা কৰা হৈছে৷
অসমৰ জনসাধাৰণৰ আহ্বানৰ প্ৰতি সঁহাৰি জনাই লোৱা এই সিদ্ধান্ত আক্ষৰিক অৰ্থতে এক উল্লেখযোগ্য ঘটনা। জাগীৰোডত ছেমিকণ্ডাক্টৰ প্ৰকল্পৰ পাছত অসমলৈ দিয়া বৃহৎ উপহাৰটি সমগ্ৰ উত্তৰ-পূৰ্বাঞ্চলৰ বাবে বৃহৎ উপহাৰ হিচাপে বিবেচিত হ’ব।”
মুখ্যমন্ত্ৰীয়ে লগতে লিখিছে, “ই কেৱল সাৰ উপলব্ধতাৰ ক্ষেত্ৰত আত্মনিৰ্ভৰশীলতা লাভ কৰাত সহায় কৰাই নহয়, আমাৰ সম্পদ প্ৰাকৃতিক গেছৰ সমলৰো সদ্ব্যৱহাৰৰ ক্ষেত্ৰত সহায় কৰিব।”
মোদী চৰকাৰক ধন্যবাদ জনাই তেওঁ লিখিছে, “মাননীয় প্ৰধানমন্ত্ৰী শ্ৰীনৰেন্দ্ৰ মোদী ডাঙৰীয়া আৰু মাননীয় বিত্তমন্ত্ৰী শ্ৰীমতী নিৰ্মলা সীতাৰমন ডাঙৰীয়ানীলৈ অসমবাসীৰ হৈ আন্তৰিক কৃতজ্ঞতা জ্ঞাপন কৰিলোঁ।”
