অনলাইন প্ৰৱঞ্চনা বা ডিজেটেল প্ৰৱঞ্চনা (Digital fraud)ৰ নিতৌ নতুন নতুন উপায় অৱলম্বন কৰি আহিছে প্ৰৱঞ্চকসকলে। এইবাৰ তেনে এক নতুন প্ৰৱঞ্চনাৰ ৰূপত দুষ্কৃতিকাৰীয়ে ১১ কোটি টকা চুৰি কৰে এজন প্ৰাক্তন জাহাজ কেপ্তেইনৰ পৰা। শ্বেয়াৰ বজাৰত ধন জমা কৰাৰ নামত প্ৰৱঞ্চনাৰে তেওঁৰ একাউণ্টৰ পৰা লুটি নিয়ে ১১ কোটি টকা। মুম্বাইৰ কলাবা (Colaba in Mumbai) অঞ্চলত সংঘটিত হৈছে এই ঘটনা।
জানিব পৰা মতে, মুম্বাইৰ বাসিন্দা এই ব্যক্তিজনক যোৱা ১৯ আগষ্টত হঠাতে কোনো অচিনাকি ব্যক্তিয়ে ৱাটছএপ গ্ৰুপ (WhatsApp Group)ত যোগ কৰিছিল। ষ্টক মাৰ্কেটত বিনিয়োগ (Investing in the stock market) কৰি অধিক ধন উপাৰ্জনৰ (Making Money) প্ৰতিশ্ৰুতি দিছিল। গ্ৰুপটোৰ এডমিনগৰাকীয়ে নিজকে আন্না স্মিথ বুলি পৰিচয় দিছিল আৰু নিয়মিতভাৱে ষ্টক মাৰ্কেটৰ কৌশল আৰু বিনিয়োগৰ সুযোগসমূহ শ্বেয়াৰ কৰিছিল।
ভুক্তভোগীয়ে গ্ৰুপৰ আন সদস্যসকলক দেখি বিশ্বাস কৰে। ষ্টক মাৰ্কেটৰ এজন প্ৰবীণ খেলুৱৈয়ে বিনিয়োগকাৰী হিচাপে ট্ৰেডিং প্লেটফৰ্মত বিনিয়োগ কৰাৰ আগ্ৰহ প্ৰকাশ কৰে। ইয়াৰ পিছতে দুষ্কৃতিকাৰীয়ে ব্যক্তিজনক আন এটা ৱাটছএপ গ্ৰুপত যোগ কৰে। তাত তেওঁক কোম্পানীটোৰ ট্ৰেডিং এপটো (Trading App) ডাউনলোড কৰিবলৈ লিংক পঠিওৱা হৈছিল।
এপটো ডাউনলোড কৰাৰ পিছত তেওঁ বিভিন্ন বিনিয়োগৰ সুযোগ সম্পৰ্কে বাৰ্তা লাভ কৰিবলৈ আৰম্ভ কৰে। ইয়াৰ ভিতৰত আছিল প্ৰতিষ্ঠানিক একাউণ্ট ট্ৰেডিং, অ’টিচি ট্ৰেডিং আৰু আই পি অ’। তাৰ পিছত প্ৰৱঞ্চকসকলে বিভিন্ন বেংক একাউণ্টলৈ টকা পঠিয়াবলৈ কয়।
জানিব পৰা মতে, ৫ ছেপ্টেম্বৰৰ পৰা ১৯ অক্টোবৰৰ ভিতৰত ব্যক্তিজনৰ একাউণ্টৰ পৰা মুঠ ২২টা লেনদেন কৰা হৈছিল। তেওঁ বিভিন্ন বেংক একাউণ্টলৈ মুঠ ১১.১৬ কোটি টকা (Total 11.16 crore) পঠিয়ায়। কিন্তু এইটো কিয় বুলি সোধাত তেওঁক কোৱা হৈছিল যে কৰৰ পৰা বাচিবলৈ একাধিক একাউণ্ট ব্যৱহাৰ কৰা হৈছে। তাৰ পিছত ২০% ছাৰ্ভিচ টেক্স দিবলৈ কয়।
উক্ত ধন পৰিশোধ কৰাৰ পিছতো প্ৰৱঞ্চকসকলে বিভিন্ন অজুহাতত অতিৰিক্ত ধন দাবী কৰি থাকে। শেষত ভুক্তভোগীয়ে ষ্টক মাৰ্কেট কোম্পানীটোৰ মুখ্য কাৰ্যালয়লৈ গৈ গম পায় যে তেওঁ প্ৰৱঞ্চকৰ জালত ভৰি দিছে। ইয়াৰ পিছতে তেওঁ আৰক্ষীৰ ওচৰত এজাহাৰ দাখিল কৰে। চাইবাৰ অপৰাধ শাখাৰ জৰিয়তে আৰক্ষীয়ে এই ঘটনাৰ তদন্ত অব্যাহত ৰাখিছে।
