আন্তৰ্জাতিক অপৰাধ আদালতে (আইচিচি) গাজা ষ্ট্ৰিপত গণহত্যা আৰু যুদ্ধ অপৰাধৰ অভিযোগত ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ (Binjamin Netanyahu) বিৰুদ্ধে গ্ৰেপ্তাৰী পৰোৱানা জাৰি কৰিছে। কিন্তু এইবাৰ এই বিষয়টোত মুখ খুলিলে নেতানিয়াহুৱে।
তেওঁ দাবী কৰে যে আইচিচিয়ে এটা “ইহুদি বিৰোধী” সিদ্ধান্ত লৈছে। তেওঁ কয় যে ইজৰাইলে “আত্মৰক্ষাৰ বাবে” যুঁজ অব্যাহত ৰাখিব। নেতানিয়াহুৱে ছ’চিয়েল মিডিয়াত লিখিছে, “ফ্ৰান্সৰ ন্যায়াধীশৰ নেতৃত্বত হেগৰ আন্তৰ্জাতিক ন্যায়ালয়ে মোৰ বিৰুদ্ধে মিছা অভিযোগ উত্থাপন কৰিছে।
গণতান্ত্ৰিকভাৱে নিৰ্বাচিত প্ৰধানমন্ত্ৰী আৰু ইজৰাইলৰ প্ৰাক্তন প্ৰতিৰক্ষা মন্ত্ৰী ইয়োভ গেলেণ্টক বাৰে বাৰে লক্ষ্য কৰি লোৱা হৈছে। যেতিয়া আমি অসামৰিক লোকৰ প্ৰাণহানি বন্ধ কৰিবলৈ আমাৰ ক্ষমতাত সকলোবোৰ কৰিব বিচাৰিছো, তেতিয়া আমাৰ বিৰুদ্ধে গণহত্যাৰ অভিযোগ অনা হৈছে। ”
ফৌজদাৰী আদালতে অভিযোগ কৰিছে যে ইজৰাইলে গাজা ষ্ট্ৰিপত অত্যাৱশ্যকীয় সামগ্ৰী ৰখাৰ অনুমতি দিয়া নাই। আৰু সেইকাৰণে দাবী কৰা হৈছে যে তাত থকা শিশুসকল পুষ্টিহীনতাৰ বাবে মৃত্যুমুখত পৰিছে।
নেতানিয়াহুৱে আইচিচিৰ অভিযোগ খাৰিজ কৰি কয় যে গাজালৈ কমেও ৭০,০০০ টন খাদ্য প্ৰেৰণ কৰিছে। তেওঁ লগতে কয় যে হামাছে সকলো সাহায্য সামগ্ৰী লুণ্ঠন কৰি আছে। নেতানিয়াহুৱে কয়, “যেতিয়া হামাছ সন্ত্ৰাসবাদীয়ে মহিলাসকলক ধৰ্ষণ কৰে, মানুহৰ ডিঙি কাটি দিয়ে, শিশুসকলক জীৱিত জ্বলাই দিয়ে, তেতিয়া কোনো ব্যৱস্থা লোৱা নহয়।”
নেতানিয়াহুৰ উপৰি বৃহস্পতিবাৰে জাৰি কৰা গ্ৰেপ্তাৰ ৱাৰেণ্টত ইজৰাইলৰ প্ৰাক্তন প্ৰতিৰক্ষা মন্ত্ৰী গেলেণ্ট আৰু হামাছ নেতা মহম্মদ দিয়াব ইব্ৰাহিম আল-মাছৰি ওৰফে মহম্মদ দেইফৰ নাম উল্লেখ কৰা হৈছে। অৱশ্যে ইজৰাইলৰ এক সামৰিক সূত্ৰই দাবী কৰে যে দেইফ ইতিমধ্যে তেওঁলোকৰ আক্ৰমণত নিহত হৈছে।
