লৰেন্স বিষ্ণয়ৰ (Lawrence Bishnoi) কনিষ্ঠ ভাতৃ আনমোল বিষ্ণয় ওৰফে ভানুক আমেৰিকাত গ্ৰেপ্তাৰ কৰা হৈছে। সূত্ৰ অনুসৰি, তেওঁক কেলিফ’ৰ্ণিয়াত আৰক্ষীৰ জিম্মাত লোৱা হৈছে। চোৰাংচোৱা সূত্ৰ মতে, চলিত মাহৰ আৰম্ভণিতে আমেৰিকাত লৰেন্সৰ ভাতৃৰ বিৰুদ্ধে জামিনবিহীন গ্ৰেপ্তাৰী পৰোৱানা জাৰি কৰা হৈছিল।
উল্লেখ্য যে কেইসপ্তাহমান পূৰ্বে মুম্বাই আৰক্ষীয়ে আনমোলক দেশলৈ ঘূৰাই অনাৰ প্ৰক্ৰিয়া আৰম্ভ কৰিছিল। মহাৰাষ্ট্ৰৰ প্ৰাক্তন মন্ত্ৰী তথা এনচিপি নেতা বাবা ছিদ্দিকীক হত্যা কৰাৰ লগতে বলীউডৰ তাৰকা ছলমান খানৰ ঘৰৰ সন্মুখত গুলীচালনাৰ ঘটনাত জড়িত আছিল বিষ্ণয় গেং।
মুম্বাই আৰক্ষীৰ সূত্ৰ অনুসৰি, এই দুয়োটা ঘটনা সংঘটিত হৈছে আনমোলৰ নিৰ্দেশত। তেৱেঁই বহিঃৰাষ্ট্ৰৰ পৰা এই আক্ৰমণৰ পৰিকল্পনা কৰিছিল। চলিত বৰ্ষৰ এপ্ৰিল মাহত ছলমানৰ ঘৰৰ সন্মুখত দুৰ্বৃত্তই গুলীচালনা কৰিছিল। সেই ঘটনাৰ পিছতেই ছলমানৰ ঘনিষ্ঠ সহযোগীক হত্যা কৰাৰ পৰিকল্পনা ৰচনা কৰা হৈছিল।
উক্ত তালিকাত প্ৰথম নাম আছিল এনচিপিৰ নেতা ছিদ্দিকীৰ।
উল্লেখ্য যে ছলমানৰ ঘৰৰ সন্মুখত সংঘটিত গুলীচালনাৰ ঘটনাকে ধৰি আনমোলৰ বিৰুদ্ধে মুঠ ১৮টা গোচৰ ৰুজু হৈছে। ২০২২ চনৰ মে’ মাহত পাঞ্জাবী সংগীত শিল্পী সিদ্ধু মুছেৱালাৰ হত্যাকাণ্ডৰ সৈতেও তেওঁ জড়িত থকাৰ সন্দেহ কৰা হৈছে।
মুছেৱালাক আক্ৰমণ কৰাৰ অভিযোগত অভিযুক্তসকলক অস্ত্ৰ যোগান ধৰাৰ অভিযোগ লৰেন্সৰ ভাতৃৰ বিৰুদ্ধে। ৰাষ্ট্ৰীয় অনুসন্ধান সংস্থাৰ (এন আই এ) ‘ম’ষ্ট ৱাণ্টেড’ তালিকাত আছে আনমোল। শেহতীয়াকৈ এন আই এয়েও ১০ লাখ টকাৰ নগদ পুৰস্কাৰ ঘোষণা কৰিছে।
২০১৫ চনৰ পৰা গুজৰাটৰ সাবৰমতী কাৰাগাৰত বন্দী হৈ আছে লৰেন্স। আৰক্ষীৰ সূত্ৰ অনুসৰি, আনমোলে তেওঁৰ হৈ বিষ্ণয় গেঙৰ বিভিন্ন অপৰাধমূলক কাৰ্যকলাপ চম্ভালি আছে। যোৱা মাহত আৰক্ষীয়ে তেওঁক দেশলৈ ঘূৰাই অনাৰ অনুমতি বিচাৰি মুম্বাইৰ নিম্ন আদালতত আবেদন কৰিছিল। এই গোচৰত আৰক্ষীয়ে আদালতত ছলমানৰ ঘৰৰ সন্মুখত গুলীচালনাৰ ঘটনাও বিশেষভাৱে উল্লেখ কৰে।
ঘটনাৰ তদন্ত আৰম্ভ হোৱাৰ পৰাই আৰক্ষীয়ে আনমোলৰ কোনো সন্ধান পোৱা নাছিল। পলাতক বুলি চিহ্নিত কৰা হৈছিল। শেহতীয়াকৈ এই সন্দৰ্ভত কিছু নিৰ্দিষ্ট তথ্য মুম্বাই আৰক্ষীৰ অপৰাধ শাখাৰ হাতলৈ আহিছিল। ইয়াৰ পিছত তদন্তকাৰীয়ে উদ্যোগ লৈ তেওঁক দেশলৈ ঘূৰাই আনিবলৈ উদ্যোগী হয়।
