সকলো জল্পনা-কল্পনাৰ অন্ত পেলাই আম আদমী পাৰ্টি ত্যাগৰ ২৪ ঘণ্টাৰ ভিতৰতে বিজেপিত যোগদান কৰে দিল্লী আপৰ জ্যেষ্ঠা নেতা কৈলাস গেহলটে (Kailash Gehlate)। দেওবাৰে বিয়লি তেওঁ দিল্লীৰ ৰাজনীতিত আলোড়নৰ সৃষ্টি কৰি আপ ত্যাগ কৰাৰ পিছত তেওঁ বিজেপিত যোগদান কৰে।
সোমবাৰে বিজেপিত যোগদান কৰি কৈলাস গেহলটে কয়, “আপ এৰাটো মোৰ বাবে সহজ পদক্ষেপ নাছিল। প্ৰথমদিনাৰ পৰাই মই আপৰ লগত আছিলো। আন্না হাজাৰেৰ আন্দোলনত ময়ো জড়িত হৈ আহিছো।
তাৰ পিছত তেওঁ কয়, বহুতে ভাবিছে মই ৰাতিৰ ভিতৰতে এই সিদ্ধান্ত লৈছোঁ বা কিবা চাপত পৰি আপ এৰিছোঁ। মই তেওঁলোকক ক’ব বিচাৰো যে ইয়াত কোনো চাপ নাছিল।”
উল্লেখ্য যে দেওবাৰে কৈলাস গেহলটে আপৰ আহ্বায়ক অৰবিন্দ কেজৰিৱাললৈ এখন পত্ৰ লিখি দল ত্যাগ কৰাৰ বিষয়ে অৱগত কৰে। দলটোৰ বৰ্তমানৰ স্থিতি আৰু কাম-কাজক লৈ অসন্তুষ্টিৰে ভৰি আছিল পত্ৰখন। তেওঁৰ মতে, আপে দলৰ ভিতৰতে কেইবাটাও ‘কঠিন প্ৰত্যাহ্বান’ৰ সন্মুখীন হ’বলগীয়া হৈছে।
তেওঁ লিখিছে, “সাধাৰণ মানুহক দিয়া প্ৰতিশ্ৰুতিবোৰ পাহৰি ৰাজনৈতিক উচ্চাকাংক্ষাৰ কথা চিন্তা কৰা হৈছে। ফলত বহু প্ৰতিশ্ৰুতি পূৰণ নোহোৱাকৈয়ে থাকি গৈছে।”
আপে নিজৰ ৰাজনৈতিক স্বাৰ্থৰ বাবে যুঁজিছে বুলি অভিযোগ উত্থাপন কৰে কৈলাসে। সেইবাবেই দিল্লীৰ সাধাৰণ মানুহ ন্যূন্তম নাগৰিক সেৱাৰ পৰা বঞ্চিত। তেওঁ যমুনা নদীৰ প্ৰদূষণৰ বিষয়টোও উত্থাপন কৰে। তেওঁ অভিযোগ কৰে যে আপ চৰকাৰে যমুনা পৰিষ্কাৰ কৰাৰ প্ৰতিশ্ৰুতি পূৰণৰ বাবে কোনো পদক্ষেপ গ্ৰহণ কৰা নাই।
আনহাতে, কৈলাসৰ দলত্যাগৰ পিছত আপ তেওঁৰ বিৰুদ্ধে সৰৱ হৈছে। আপ নেতাৰ এটা অংশৰ মতে, বিজেপিৰ হেঁচাত তেওঁ এই সিদ্ধান্ত গ্ৰহণ কৰে। ইয়াৰ পূৰ্বে ইডি আৰু আয়কৰ বিভাগে তেওঁৰ ঘৰত অভিযান চলাইছিল।
আপৰ সূত্ৰ অনুসৰি, কেন্দ্ৰীয় তদন্তকাৰী সংস্থাই তেওঁৰ ওপৰত চকু ৰাখিছে। হয়তো সেইবাবেই তেওঁ দল ত্যাগ কৰিছে। আপ নেতা সঞ্জয় সিঙেও একেই অভিযোগ উত্থাপন কৰে। অৱশ্যে বিজেপিত যোগদানৰ বাবে তেওঁৰ ওপৰত কোনো হেঁচা নাই বুলি স্পষ্ট কৰি দিয়ে কৈলাস গেহলটে।
উল্লেখ্য যে পঞ্চাশ বছৰীয়া কৈলাস গেহলট দীৰ্ঘদিন আপৰ সৈতে জড়িত হৈ চৰকাৰৰ কেইবাটাও গুৰুত্বপূৰ্ণ বিভাগ চম্ভালি আছিল। তেওঁ দিল্লী চৰকাৰৰ গৃহ, পৰিবহণ, তথ্য প্ৰযুক্তি আৰু মহিলা আৰু শিশু কল্যাণৰ ৰাজ্যিক মন্ত্ৰী আছিল।
লক্ষণীয় কথাটো হৈছে যে অহা বছৰ দিল্লীত বিধানসভা নিৰ্বাচন আছে। তাৰ পূৰ্বে গেহলটৰ দলত্যাগ আৰু বিজেপিত যোগদান কৰাটো এটা ডাঙৰ আঘাত বুলি ধাৰণা কৰা হৈছে।
