পুনৰ অস্থিৰ হৈ পৰিছে মণিপুৰ (Manipur)। জিৰিবাম জিলা (Jiribam District)ত চি আৰ পি এফৰ গুলীচালনাত ১১ জন কুকি উগ্ৰপন্থীৰ মৃত্যু (11 Kuki militants killed)ৰ পিছত সোমবাৰে নিশাৰ পৰা জাৰি কৰা হৈছে সান্ধ্য আইন (Curfew)। নিশাৰ ভাগত চুবুৰীয়া পশ্চিম ইম্ফল জিলাত অস্ত্ৰধাৰী কুকি উগ্ৰপন্থীয়ে আক্ৰমণ কৰাৰ অভিযোগ। জানিব পৰা মতে, এই ঘটনাত দুজন সাধাৰণ নাগৰিক আহত হৈছে। তাৰ লগতে মঙলবাৰে জিৰিবামৰ এটা ভস্মীভূত ঘৰৰ পৰা উদ্ধাৰ হয় দুজন বৃদ্ধৰ মৃতদেহ।
আনহাতে, মঙলবাৰেও জিৰিবাম জিলাৰ কেইবাটাও অঞ্চলত অব্যাহত আছে সান্ধ্য আইন। সমগ্ৰ জিলাখনতে নিমাওমাও পৰিবেশ। সোমবাৰে বিয়লি অসমৰ সীমান্তৱৰ্তী এই জিলাখনৰ চি আৰ পি এফ শিবিৰত এদল লোকে আক্ৰমণ কৰে। চি আৰ পি এফে প্ৰতিশোধ লোৱাৰ ফলত আক্ৰমণকাৰীৰ ১১ জন নিহত হয়। কেন্দ্ৰীয় বাহিনীৰ মতে, নিহত আটাইকেইজন কুকি উগ্ৰপন্থী। তেওঁলোকৰ গুলীচালনাত এজন চি আৰ পি এফ জোৱানো গুৰুতৰভাৱে আহত হয়। তেওঁ অসমৰ শিলচৰ চিকিৎসা মহাবিদ্যালয়ত ভৰ্তি হৈ আছে। পশ্চিম ইম্ফলতো সোমবাৰে নিশাও অব্যাহত থাকে সংঘৰ্ষ। তাত কুকি উগ্ৰপন্থীৰ গুলীচালনাত আহত হয় দুজন ব্যক্তি। ইয়াৰ উপৰি মঙলবাৰে পুৱা জিৰিবামৰ এটা ঘৰৰ ভিতৰৰ পৰা দুজন বৃদ্ধ লোকৰ অগ্নিদগ্ধ মৃতদেহ উদ্ধাৰ হোৱা বুলি আৰক্ষী সূত্ৰই প্ৰকাশ কৰিছে। ইয়াৰ পিছত সমগ্ৰ জিৰিবাম জিলাত জাৰি কৰা হৈছে সান্ধ্য আইন।
