শাৰদীয় দুর্গোৎসৱৰ আজি যষ্ঠিৰ দিনা মন্দিৰে মন্দিৰে দেৱী প্রতিষ্ঠা কৰাৰ সমান্তৰালভাৱে ডিফু পৌৰসভাৰ ১নং ৱাৰ্ডৰ সদস্য হাৰাধন ঘোষৰ নেতৃত্বত পৌৰসভাৰ অধীনৰ দৰিদ্ৰ মহিলাৰ মাজত বিভিন্ন বস্ত্ৰ বিতৰণ কৰা হয়। ডিফুৰ বাৰোৱাৰী পূজা মন্দিৰৰ সমীপত অনুষ্ঠিত এই বস্ত্র বিতৰণি অনুষ্ঠানত উপস্থিত থাকে লুম্বাজং পৰিষদীয় সমষ্টিৰ এমএচি জনী তিমুং আৰু ডিফু পৌৰসভাৰ অধ্যক্ষ ৰাহ ক্র’।
ডিফু পৌৰসভাৰ অধীনৰ জনজাতীয় মহিলাসকলক কাৰ্বি পৰম্পৰাগত পোছাক পিনি আৰু বেংগলী-আন সম্প্ৰদায়ৰ মহিলাৰ মাজত শাৰী বিতৰণ কৰে। বিতৰণি অনুষ্ঠানৰ অন্তত ৱাৰ্ড কমিচনাৰ হাৰাধন ঘোষে সংবাদমাধ্যমৰ আগত কয় যে- শাৰদীয় দুর্গোৎসৱ আৰু ৩২ সংখ্যক মাণ্ডলিক কাৰ্বি যুৱ মহোৎসৱ উপলক্ষে ডিফু পৌৰসভাৰ ১নং বাৰ্ডৰ কমিচনাৰৰ উদ্যোগত এই পদক্ষেপ গ্রহণ কৰা হৈছে।
ৱাৰ্ড কমিচনাৰ জনৰ এবছৰৰ মাননিৰ ধন ব্যয় কৰি দুর্গা পূজা আৰু মাণ্ডলিক যুৱ মহোৎসৱৰ সময়ছোৱাত যাতে এযোৰ নতুন সাজ পৰিধান কৰিব পাৰে তাৰ বাবে এয়াই ক্ষুদ্র প্রয়াস বুলিও কয় হাৰাধন ঘোষে ৷
