অসম তথা চুবুৰীয়া ৰাজ্যসমূহত ব্যাপক হাৰত নিষিদ্ধ ড্ৰাগছৰ সৰবৰাহ (Drug trafficking) সমাজ জীৱনৰ বাবে এক বৃহৎ সংকটত পৰিণত হোৱাৰ সময়তে শুকুৰবাৰে ১২বাজি ৪৬ মিনিটত অসম-নাগালেণ্ড সীমান্তৱৰ্তী খটখটীত আৰক্ষীয়ে অভিযান (Police raid in Khatkhati) চলাই হেৰʼইনসহ এজন প্ৰাক্তন বিদ্ৰোহী সংগঠনৰ শীৰ্ষ নেতাক গ্ৰেপ্তাৰ কৰা ঘটনাই ব্যাপক চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি, আজি দিনৰ প্ৰায় ১২.৪৬ বজাত খটখটী থানাৰ ভাৰপ্ৰাপ্ত বিষয়া নিতুল শইকীয়া, নেতৃত্বত উপ-পৰিদৰ্শক জিতুমণি শইকীয়া আৰু সহকাৰী উপ-পৰিদৰ্শক পংকজ শইকীয়াৰ সহযোগত আৰক্ষীৰ এটা দলে ডিমাপুৰৰ দিশৰ পৰা আহি থকা এএছ-৩১-৪২৯১ নম্বৰৰ মাৰুতী এক্সপ্ৰেছʼ বাহনখন কাৰাগাওঁ ৰানাবস্থিত তালাচী চলায়।
উক্ত অভিযানত আৰক্ষীয়ে বাহনখনৰ পৰা এটা চাবোনৰ বাকচত লুকুৱাই অনা অৱস্থাত ১১.০৮০ গ্ৰাম হেৰʼইন জব্দ (Heroin seized) কৰিবলৈ সক্ষম হয়। বোকাজান মহকুমা আৰক্ষী বিষয়া ৰুস্তম ৰাজ ব্ৰক্ষ্মৰ ও সাক্ষীগনৰ উপস্থিত হেৰইনখিনি জব্দ কৰে। এই সন্দৰ্ভত আৰক্ষীয়ে এগৰাকী মহিলাকে ধৰি তিনিটা সৰবৰাহকাৰীক গ্ৰেপ্তাৰ কৰে। ধৃত সৰবৰাহকাৰীকেইটা ক্ৰমে চাহিল মুণ্ডা, ৰোহিত ৰয় আৰু চামচুন নেহাৰ বুলি চিনাক্ত কৰা হৈছে। ইয়াৰে চাহিল মুণ্ডা (Sahil Munda) নামৰ সৰবৰাহকাৰীটো প্ৰাক্তন আদিবাসী সশস্ত্ৰ উগ্ৰপন্থী সংগঠন ʼআপলাʼৰ মুখ্য সৈনাধ্যক্ষ আছিল বুলি জানিব পৰা গৈছে। বিগত বৰ্ষৰ জুলাই মাহত উক্ত উগ্ৰপন্থী সংগঠনটোৱে আত্মসমৰ্পণ কৰি মূলসুঁতিলৈ আহিছিল।
ড্ৰাগছ সৰবৰাহৰ দৰে দুষ্কাৰ্যত লিপ্ত থকা এই স্বয়ংভূ প্ৰাক্তন বিদ্ৰোহী নেতা গৰাকীয়ে নিজাববীয়াকৈ আইবিএন ২৪X৭ শীৰ্ষক নিউজ পৰ্টেল খুলি নিজকে সাংবাদিক হিচাপে পৰিচয় দিয়াৰো চেষ্টা চলাইছিল। স্বয়ংভূ পৰ্টেল চেনেলৰ সাংবাদিক হোৱাৰ সুবাদতে বাহনত ʼপ্ৰেছʼ লিখি উক্ত বাহনতে আৰক্ষীৰ চকুত ধূলি দি ড্ৰাগছৰ সৰবৰাহ কৰি আহিছিল। অৱশেষত আৰক্ষীৰ তৎপৰতাৰ বাবে চাহিল মুণ্ডা নামৰ এই বহুৰূপী ড্ৰাগছ সৰবৰাহকাৰীটো আৰক্ষীৰ জালত পৰে।
