ASSAM TIMES POST
নতুন বছৰত জীৱন সংগীৰ কথা ঘোষণা কৰি চমক দিলে হাৰ্দিক পাণ্ডিয়াই৷ এতিয়া ২২ গজলৈ ঘুৰি অহাৰ অপেক্ষাত আছে হাৰ্দিক পাণ্ডিয়া৷ আসন্ন নিউজীলেণ্ড ভ্ৰমণৰ সময়তে আন্তৰ্জাতিক ক্ৰিকেটলৈ ঘুৰি অহাৰ সম্ভাৱনা আছে অল ৰাউণ্ডাৰজনৰ৷ এই বছৰত অষ্ট্ৰেলিয়াত অনুষ্ঠিত হ’ব টি-২০ বিশ্ব কাপ৷
বিশ্ব কাপত হাৰ্দিক পাণ্ডিয়াৰ ভূমিকা অতি গুৰুত্বপূৰ্ণ হ’ব বুলি চৰ্চা হৈছে ক্ৰিকেট মহলত৷ যদি মহেন্দ্ৰ সিং ধোনীয়ে টি-২০ বিশ্ব কাপ নেখেলে তেন্তে ফিনিচিঙৰ দায়িত্ব সম্পূৰ্ণৰূপে পৰিব হাৰ্দিক পাণ্ডিয়াৰ ওপৰত৷ অৱশ্যে হাৰ্দিক পাণ্ডিয়াই জনাই দিছে যে তেওঁৰ বাবে ধোনীৰ সৈতে মিলাবলৈ যোৱাটো সম্ভৱ নহ’ব৷
ধোনীয়ে নেখেলিলে টি-২০ বিশ্ব কাপত তেওঁ সেই অভাব পুৰাব পাৰিবনে? এই বিষয়ত হাৰ্দিক পাণ্ডিয়াই স্পষ্টকৈ কয়, মই কেতিয়াও ধোনীৰ ঠাইত হ’ব নোৱাৰো৷ সত্য কৈছো, বিশ্ব কাপৰ প্ৰত্যাহ্বান ল’বৰ বাবে মই উদগ্ৰীৱ৷ মই যেতিয়াই যি কৰিছো সেয়া দলৰ বাবে কৰিছো৷ মই লাহে লাহে চাইছো বিশ্ব কাপৰ লক্ষ্য৷ উল্লেখ্য যে যোৱা বছৰৰ আৰম্ভণিতে ‘কফি উইথ কৰ্ণ’ অনুষ্ঠানত সতীৰ্থ লোকেশ ৰাছেলৰ সৈতে বিৰ্তকিত মন্তব্য কৰিছিল হাৰ্দিক পাণ্ডিয়াই৷ তাৰ ফলত তেওঁক কিছুদিন নিৰ্বাসিত কৰা হৈছিল৷
