মণিপুৰত এতিয়াও জ্বলি আছে অশান্তিৰ (Manipur Violence) জুই। বিগত দুটা সপ্তাহত সন্দেহযুক্ত উগ্ৰপন্থী (Suspected militants in two weeks)য়ে চাৰিজন কাঠমিস্ত্ৰী (Four carpenters), দুজন আৰক্ষী কমাণ্ডো (Two police commandos) আৰু এজন গাঁওৰক্ষী স্বেচ্ছাসেৱকক হত্যা (A village guard volunteer killed) কৰে। ইয়াৰ পিছতে বৃহস্পতিবাৰে ৰাজধানী ইম্ফলৰ মাজমজিয়াত থকা ঐতিহাসিক কংলা দুৰ্গৰ ভিতৰত ৰাজহুৱা সভা অনুষ্ঠিত কৰিবলৈ আহ্বান জনাইছে এটা গাঁও প্ৰতিৰক্ষা গোটে।
তাৰ ২৪ ঘণ্টা পূৰ্বেই অশান্তিৰ আশংকাত শ শ ৰাজ্য আৰু কেন্দ্ৰীয় নিৰাপত্তা বাহিনীয়ে এসময়ৰ মণিপুৰ সাম্ৰাজ্যৰ ক্ষমতাৰ কেন্দ্ৰবিন্দু কংলা দুৰ্গ (Focal point is the Kangla Fort) ঘেৰাও কৰিছে।
বৃহস্পতিবাৰৰ জনসভালৈ ‘আৰম্বাই টেংগোল’ নামৰ গাঁও প্ৰতিৰক্ষা গোটে আমন্ত্ৰণ জনাইছে সকলো বিধায়কক। সূত্ৰ অনুসৰি, মণিপুৰৰ জাতিগত সংঘাতৰ সন্দৰ্ভত নেতাসকলে নিজৰ স্থিতি স্পষ্ট কৰিব। কটকটীয়া নিৰাপত্তাৰ মাজতো বুধবাৰৰ পৰা ‘আৰম্বাই টেংগোল’ৰ সদস্যসকলে গড়টোত সমবেত হ’বলৈ আৰম্ভ কৰিছে।
কেন্দ্ৰীয় গৃহ মন্ত্ৰালয়ৰ তিনিজনীয়া বিশেষ দল সোমবাৰে নিশা ইম্ফলত উপস্থিত হৈ ‘আৰম্বাই টেংগোল’ৰ সদস্যসকলক সাক্ষাৎ কৰে। মঙলবাৰে পুনৰ লগ হয়। গৃহ মন্ত্ৰালয়ৰ উত্তৰ-পূব পৰিক্ৰমা উপদেষ্টা এ কে মিশ্ৰৰ নেতৃত্বত গঠিত দলটোৱে ৰাজ্যসভাৰ সাংসদ লিচেম্বা সনাজাওবাৰ বাসগৃহত এক বৈঠক অনুষ্ঠিত কৰে।
এই সকলোবোৰৰ মাজতে নগা জনগোষ্ঠীৰ নেতাকে ধৰি ৰাজ্যখনৰ মুঠ ৩৫জন বিধায়কে কেন্দ্ৰৰ পৰা ২৫টা বিদ্ৰোহী কুকি গোটৰ সৈতে হোৱা ‘চাচপেন্সন অব অপাৰেচন’ চুক্তি বাতিল কৰিবলৈ দাবী জনায়। অন্যথা তেওঁলোকে ৰাইজৰ সৈতে আলোচনা কৰি ‘উচিত ব্যৱস্থা’ গ্ৰহণ কৰিব। ৰাজনৈতিক মহলে ভাবে যে এই ‘উচিত ব্যৱস্থা’ আচলতে এক ভয়ংকৰ ভাবুকি। আনকি ইয়াৰ বাবে ৰাজ্যখনৰ বিজেপি চৰকাৰ পতন হ’ব পাৰে বুলিও আশংকা কৰা হৈছে।
সোমবাৰে বিধায়কসকলে এক প্ৰস্তাৱত কয় যে কেন্দ্ৰ, ৰাজ্য আৰু ২৫টা কুকি গোটৰ মাজত ত্ৰিপাক্ষিক ‘চাচপেন্সন অব অপাৰেচন’ চুক্তি বাতিল হ’লে নিৰাপত্তা বাহিনীয়ে কুকি বিদ্ৰোহীৰ বিৰুদ্ধে পূৰ্ণাংগ অভিযান আৰম্ভ কৰিবলৈ সক্ষম হ’ব।
‘চাচপেন্সন অব অপাৰেচন’ চুক্তি অনুসৰি, বিদ্ৰোহীসকলক কিছুমান বিশেষ শিবিৰত ৰখা হৈছে।
অভিযোগ অনুসৰি, ২০২৩ চনৰ মে’ মাহত কুকি আৰু মেইটেইসকলৰ মাজত জাতিগত সংঘৰ্ষৰ সৃষ্টি হোৱাৰ পিছত কেইবাটাও শিবিৰত বিদ্ৰোহীৰ সম্পূৰ্ণ উপস্থিতি দেখা পোৱা নাই। মণিপুৰৰ নিৰাপত্তা উপদেষ্টা কুলদীপ সিঙে যোৱা সপ্তাহত কয় যে ম্যানমাৰৰ বিদ্ৰোহীয়ে সীমান্তৱৰ্তী ম’ৰে চহৰত নিৰাপত্তা বাহিনীক আক্ৰমণ কৰিব পাৰে। অৱশ্যে ইয়াৰ কোনো প্ৰমাণ পোৱা নাই। অৱশ্যে নিৰাপত্তাৰক্ষীৰ ওপৰত হোৱা আক্ৰমণত কুকি বিদ্ৰোহী জড়িত থকাৰ স্বীকাৰ কৰে কুলদীপে।
