চৈয়দ মুস্তাক আলী ট্ৰফীৰ (Syed Mushtaq Ali Trophy) কোৱাৰ্টাৰ ফাইনেলত প্ৰৱেশ কৰিছে অসম (Assam in quarterfinals)। মঙলবাৰে শক্তিশালী পশ্চিম বংগক পৰাস্ত কৰি কোৱাৰ্টাৰ ফাইনেলত প্ৰৱেশ কৰে অসম। অসমৰ হাতত ৮ উইকেটত পৰাস্ত হয় সুদীপ কুমাৰ ঘৰমীৰ দল। ২০ অভাৰৰ মেচখনত প্ৰথমে বেটিং কৰি বংগই ৮ উইকেটত ১৩৮ ৰান সংগ্ৰহ কৰে। উত্তৰত অসমে ১৭.৫ অভাৰত ২ উইকেটত ১৪২ ৰান সংগ্ৰহ কৰে। দলৰ জয়ত গুৰুত্বপূৰ্ণ ভূমিকা পালন কৰে ৰিয়ান পৰাগে (Riyan Parag)। লগতে তেওঁ টি-২০ ক্ৰিকেটত অভিলেখ (Record in T20 cricket) গঢ়িবলৈও সক্ষম হয়।
ইয়াৰ লগে লগে পৰাগে একেৰাহে ৭খন টি-২০ মেচত অৰ্ধশতৰাণ সংগ্ৰহ কৰে। বিশ্বৰ আন কোনো ক্ৰিকেটাৰৰ এই উদাহৰণ নাই। একেৰাহে ৭খন মেচত তেওঁ ৬১ ৰান, অপৰাজিত ৭৬, অপৰাজিত ৫৩, ৭৬, ৭২, অপৰাজিত ৫৭ আৰু অপৰাজিত ৫০ ৰান সংগ্ৰহ কৰে।
মোহালীৰ ২২ গজত প্ৰথমে বেটিং কৰি সুফল নাপালে বংগই। অসমৰ বলিং আক্ৰমণৰ সন্মুখত টিকিব নোৱাৰে বংগৰ দলটো। অসমৰ আকাশ সেনগুপ্তাই ২৯ ৰানত ৩টা উইকেট দখল কৰে। ২৩ ৰানত ২ উইকেট লয় পৰাগে।
বলৰ পিছত পৰাগে বেটেৰেও সফলতা লাভ কৰে। এয়া হৈছে টি-২০ ক্ৰিকেটত এক নতুন অভিলেখ। আনহাতে, অসমৰ অধিনায়ক পৰাগে ৩১টা বলত ৫০ ৰান সংগ্ৰহ কৰি অপৰাজিত হৈ থাকে। তেওঁৰ বেটৰ পৰা ২টা চাৰি আৰু ৪টা ছয় আহে।
