ক্ৰিকেট বিশ্বত এটা সময়ত বিশ্বৰ আগশাৰীৰ দেশৰ বেটছমেনসকলে সমীহ কৰিছিল কেৰিবিয়ান পেচ আক্ৰমণক। কেৱল সিমানেই নহয়, কেৰিবিয়ান পেচ বেটাৰীৰ ভয়ত সকলোৱে কঁপিছিল। সেই সময়ত কেৰিবিয়ান পেচ আক্ৰমণৰ মুখামুখী হোৱাৰ দৃশ্য চাবলগীয়া আছিল। কিন্তু তাৰ বাহিৰেও ৱেষ্ট ইণ্ডিজৰ ক্ৰিকেটাৰ (West Indies cricketers)সকলৰ আন কেইটামান বাহ্যিক দিশ আছে, যাৰ বাবে তেওঁলোক প্ৰায়ে বিতৰ্কৰ শিৰোনামত আহে। এক কথাত ক’বলৈ গ’লে ৱেষ্ট ইণ্ডিজৰ বেছিভাগ ক্ৰিকেটাৰেই বিতৰ্কিত জীৱনশৈলী ভালপায়। তেনে এজন ক্ৰিকেটাৰ হৈছে টিনো বেষ্ট (Crickter Tino Best)।
ৱেষ্ট ইণ্ডিজ ক্ৰিকেট দলৰ এই প্ৰাক্তন পেচাৰগৰাকীয়ে ২০১৬ চনত তেওঁৰ আত্মজীৱনী ‘মাইণ্ড দ্য উইণ্ডোজ : মাই ষ্ট’ৰী’ (Autobiography ‘Mind the Windows: My Story) প্ৰকাশ কৰিছিল। তাত তেওঁ প্ৰায় ৬৫০ গৰাকী মহিলাৰ সৈতে শয্যাসঙ্গী হোৱাৰ কথা উল্লেখ কৰিছিল। আৰু সেইবাবেই তেওঁ নিজকে ‘ব্লেক ব্ৰেড পিট’ বুলিও উল্লেখ কৰিছিল। তেওঁ নিজকে পৃথিৱীৰ আটাইতকৈ ধুনীয়া সুঠাম মানুহ বুলিও কয়।
তেওঁ লিখিছে, “মই নাৰীক ভালপাওঁ। তেওঁলোকে মোক ভালপায়। ময়ো নিজকে পৃথিৱীৰ আটাইতকৈ ধুনীয়া সুঠাম মানুহ বুলি গণ্য কৰোঁ। বহুতে ধেমালিতে মোক ব্লেক ব্ৰেড পিট বুলি কয়।” লগতে তেওঁ কয় যে তেওঁ ডেটিং কৰি ভালপায় আৰু মহিলাৰ সৈতে যৌন সম্পৰ্ক স্থাপন কৰে। ইতিমধ্যে তেওঁ ৫০০ৰ পৰা ৬৫০ গৰাকী মহিলাৰ সৈতে শাৰীৰিক সম্পৰ্ক স্থাপন কৰিছে।
বেষ্টে লগতে কয় যে তেওঁ মহিলাৰ সৈতে যৌন সম্পৰ্ক স্থাপন কৰিলেও বা তেওঁলোকৰ সৈতে ডেটিঙলৈ গʼলেও তেওঁ কেতিয়াও ইয়াৰ প্ৰভাৱ খেলত পৰিব দিয়া নাছিল। তেওঁ স্বীকাৰ কৰে যে পুৱা সাৰ পোৱাৰ পিছত নিশা যি হৈছিল তাৰ কোনো প্ৰভাৱ খেলৰ ওপৰত নপৰে। টিনো বেষ্টে দাবী কৰিছে যে ৱেষ্ট ইণ্ডিজ ক্ৰিকেট দলত তেওঁতকৈ কঠোৰ অনুশীলন কোনেও কৰিব নোৱাৰে।
উল্লেখযোগ্য যে ২০১৪ চনত তেওঁ ৱেষ্ট ইণ্ডিজৰ হৈ অন্তিমখন আন্তঃৰাষ্ট্ৰীয় মেচ খেলিছিল। টিনো বেষ্টে দেশৰ হৈ তিনিওটা ফৰ্মেটত ক্ৰিকেট খেলিছিল। ইয়াৰে তেওঁ ২৫খন টেষ্ট, ২৩খন এদিনীয়া আৰু ৬খন টি-২০ খেলিছিল। অৱশ্যে খেলপথাৰৰ বাহিৰত বিভিন্ন গোচৰৰ বিষয়ে তেওঁ সদায় আলোচনাত আছিল।
