মণিপুৰত (Manipur Violence) মহিলাৰ ওপৰত সংঘটিত হিংসাৰ ধাৰাবাহিক ঘটনাক লৈ পুনৰ উদ্বেগ প্ৰকাশ কৰিছে উচ্চতম ন্যায়ালয়ে। মুখ্য ন্যায়াধীশ ডি ৱাই চন্দ্ৰচুড়ৰ (D Y Chandrachud) নেতৃত্বত বিচাৰপীঠৰ পৰ্যবেক্ষণ, “প্ৰতিপক্ষ সম্প্ৰদায়ক বশ্যতা স্বীকাৰ কৰিবলৈ বাধ্য কৰাবলৈ মণিপুৰত মহিলাৰ ওপৰত গণ নিৰ্যাতন সংঘটিত হৈছে।” উচ্চতম ন্যায়ালয়ৰ মন্তব্য, “নাৰীৰ বিৰুদ্ধে যৌন হিংসা কোনো কাৰণতে সহ্য কৰা নহ’ব। আৰু ৰাজ্য চৰকাৰেই ইয়াক ৰোধ কৰিব লাগিব।”
উল্লেখযোগ্য যে যোৱা ২০ জুলাইত মণিপুৰৰ কাংপকপিত মহিলাক বিবস্ত্ৰ কৰি ৰাজপথত ঘূৰোৱা ভিডিঅ’ আৰু দলীয় ধৰ্ষণৰ অভিযোগৰ ওপৰত তীব্ৰ প্ৰতিক্ৰিয়া প্ৰকাশ কৰে উচ্চতম ন্যায়ালয়ে।
যোৱা ৮ আগষ্টত মণিপুৰৰ হিংসাৰ তদন্ত আৰু হিংসাৰ বলি হোৱা লোকসকলৰ সকাহ আৰু পুনৰ সংস্থাপনৰ ওপৰত নজৰ ৰাখিবলৈ মুখ্য ন্যায়াধীশৰ বিচাৰপীঠে উচ্চ ন্যায়ালয়ৰ তিনিজন অৱসৰপ্ৰাপ্ত ন্যায়াধীশৰ নেতৃত্বত এখন সমিতি গঠন কৰে। মণিপুৰত সংঘটিত হিংসাত্মক ঘটনাৰ তদন্তৰ লগত জড়িত ৪২টা বিশেষ তদন্তকাৰী দলক (এছআইটি) অন্য ৰাজ্যৰ ডিআইজি পৰ্যায়ৰ আৰক্ষী বিষয়াই নিৰীক্ষণ কৰিব বুলিও অৱগত কৰা হয়।
