Vande Bharat Express catches fire I এইবাৰ বন্দে ভাৰত এক্সপ্ৰেছৰ ডবাত জুই

এইবাৰ বন্দে ভাৰত এক্সপ্ৰেছৰ (Vande Bharat Express) এটা ডবাত অগ্নিকাণ্ড সংঘটিত হৈছে। সোমবাৰে পুৱা ভূপালৰ (Bhopal) পৰা দিল্লী অভিমুখে গৈ আছিল ৰে’লখনত হঠাৎ এটা ডবাত জুই লাগে। অৱশ্যে তথ্য লাভ কৰাৰ লগে লগে অগ্নিনিৰ্বাপক বাহিনী ঘটনাস্থলীত উপস্থিত হয়। পিছত নিৰাপদে খালী কৰা হয় ডবাটোৰ যাত্ৰীসকলক। অৱশ্যে কোনো লোক হতাহত হোৱাৰ খবৰ পোৱা হোৱা নাই। সোমবাৰে পুৱা মধ্যপ্ৰদেশৰ কুৰৱাই কেথোৰা অঞ্চলত (Kurwai Kethora) সংঘটিত হয় এই ঘটনা।

ৰে’লৱেৰ সূত্ৰৰ পৰা জানিব পৰা মতে, প্ৰথমটে অগ্নিকাণ্ড দেখা গৈছিল বেটাৰী বাকচত। অগ্নিকাণ্ড সংঘটিত হোৱাৰ পিছতে ৰেʼলৱেই এক বিবৃতিত কয় যে বন্দে ভাৰত এক্সপ্ৰেছৰ মজিয়াত থকা বেটাৰী বাকচত অগ্নিকাণ্ড সংঘটিত হয়। অগ্নিনিৰ্বাপক বাহিনীৰ লোকে উক্ত স্থানত উপস্থিত হৈ জুই নিৰ্বাপন কৰে। বেটাৰীৰ বাকচটোত অগ্নিকাণ্ড দেখা গৈছে যদিও জুই কেনেকৈ আৰম্ভ হʼল সেয়া স্পষ্ট নহয়। ৰেʼলৱেৰ সূত্ৰ অনুসৰি, তদন্ত অব্যাহত আছে। ইতিমধ্যে ছচিয়েল মিডিয়াত বিয়পি পৰিছে জুইৰ ভিডিঅ’।