মঙলবাৰে এক দুৰ্যোগৰ সন্মুখীন (In the face of disaster) হয় বংগৰ মুখ্যমন্ত্ৰী মমতা বেনাৰ্জীৰ (Chief Minister Mamata Banerjee) হেলিকপ্টাৰ (Helicopter)। পঞ্চায়ত নিৰ্বাচনৰ প্ৰচাৰৰ অন্তত জলপাইগুৰিৰ ক্ৰান্তিৰ পৰা বাগডোগ্ৰালৈ ৰাওনা হৈছিল মুখ্যমন্ত্ৰীগৰাকী। হঠাতে আকাশখন কʼলা হৈ পৰে আৰু প্ৰচণ্ড বৰষুণ আৰম্ভ হয়। লগে লগে পাইলটে হেলিকপ্টাৰখন স্বচ্ছ আকাশৰ ফালে ঘূৰাই দিয়ে।
কিন্তু তলত বৈকুণ্ঠপুৰৰ ঘন অৰণ্যৰ বাবে তেওঁ ততাতৈয়াকৈ হেলিকপ্টাৰখন অৱতৰণ কৰিব নোৱাৰিলে। কিছু মুহূৰ্তৰ ভিতৰতে পাইলটে সেৱকৰ এয়াৰবেছটো দেখে। তাতে তেওঁ জৰুৰীকালীন অৱতৰণ কৰে। মুখ্যমন্ত্ৰী আৰু তেওঁৰ সহযাত্ৰীসকল নিৰাপদে অৱতাৰণ কৰে। বিয়লি তেওঁলোক বাগডোগ্ৰাৰ পৰা বিমানযোগে কলকাতালৈ উভতি যোৱাৰ কথা।
মঙলবাৰে জলপাইগুৰিৰ মালবজাৰত মুখ্যমন্ত্ৰীৰ বৈঠক অনুষ্ঠিত হয়। দিনৰ ১ বজাৰ ভিতৰত সভাৰ অন্ত পৰে। ইয়াৰ পিছতে ক্ৰান্তিৰ পৰা হেলিকপ্টাৰেৰে বাগডোগ্ৰালৈ ৰাওনা হয় মুখ্যমন্ত্ৰী। মুখ্যমন্ত্ৰীৰ সৈতে একেখন হেলিকপ্টাৰতে আছিল তেওঁৰ নিৰাপত্তাৰক্ষী স্বৰূপ গোস্বামী আৰু সাংবাদিক বিশ্ব মজুমদাৰ।
ক্ৰান্তিৰ পৰা বাগডোগ্ৰালৈ হেলিকপ্টাৰ যাত্ৰাৰ সময় লাগে মাত্ৰ১৩ মিনিট। ইয়াৰ পূৰ্বে বতৰ বিজ্ঞান বিভাগে জনাইছিল যে বিমান চলাচলৰ সময়ত বতৰ কিছু বেয়া হʼব পাৰে। কিন্তু পাইলটে কয়, তেওঁ কোনো সমস্যা নোহোৱাকৈ বাগডোগ্ৰালৈ যাব পাৰিব। কিন্তু উৰণৰ কেইটামান মুহূৰ্তৰ ভিতৰতে মুখ্যমন্ত্ৰীৰ হেলিকপ্টাৰখন ভয়াৱহ দুৰ্যোগৰ সন্মুখীন হয়। কিছুমুহূৰ্তৰ ভিতৰতে তিনিওফালৰ পৰা আকাশখন কʼলা হৈ পৰে। প্ৰচণ্ড বৰষুণ দিবলৈ ধৰে। পাইলটে বুজি পালে যে ইয়াতকৈ আৰু আগুৱাই যোৱাটো ঠিক নহয়। কিন্তু তাৰ পিছত তলত বৈকুণ্ঠপুৰৰ ঘন অৰণ্য। ফলত অৱতৰণ কৰাৰ কোনো উপায় নাছিল।
পাইলটে হেলিকপ্টাৰখন আকাশ পৰিষ্কাৰ থকা দিশলৈ ঘূৰাই দিয়ে, যʼত গতিপথ দৃষ্টিগোচৰ হৈছিল। কিন্তু তেতিয়াও তেওঁ কʼত অৱতৰণ কৰিব ধৰিব পৰা নাছিল। বাগডোগ্ৰা অভিমুখে যোৱাৰ প্ৰশ্নই নুঠে। অনিবাৰ্যভাৱে তেওঁ শিলিগুৰি অভিমুখে যায়। অৱশেষত শিলিগুৰিৰ উপকণ্ঠ অঞ্চলৰ শালুগড়ৰ সমীপৰ সেৱক এয়াৰবেছত জৰুৰীকালীন অৱতৰণ কৰে মমতাৰ হেলিকপ্টাৰখন।
