4 boys drown at Mumbai’s Juhu beach I নিষেধাজ্ঞাক উপেক্ষা কৰি উত্তাল সমুদ্ৰত ৫ কিশোৰ, মুম্বাইৰ জুহু বিচত ডুবিল ৪

বিপর্যয়ৰ বাবে উত্তাল সমুদ্ৰ। সৃষ্টি হৈছে বিশাল ঢৌ। এই পৰিস্থিতিত ‘লাইফগাৰ্ড’ৰ নিষেধাজ্ঞাক উপেক্ষা কৰি মুম্বাইৰ (Mumbai) পাঁচজন কিশোৰ সাগৰত নামি ডুব যায়। তাৰে মাজৰ পৰা উদ্ধাৰ হয় এজন কিশোৰ। মুম্বাইৰ জুহু বিচত (Juhu Beach) সংঘটিত হয় এই ঘটনা। ‘বিপৰ্যয়’ ঘূৰ্ণীবতাহৰ আগমনৰ বাবে মুম্বাই আৰু মহাৰাষ্ট্ৰৰ সকলো বিচ সম্প্ৰতি জনসাধাৰণৰ বাবে বন্ধ কৰি দিয়া হৈছে। কিন্তু নিষেধাজ্ঞা অমান্য কৰি পাঁচজন কিশোৰ সাগৰত নামে।http://(Juhu Beach)

সোমবাৰে সন্ধিয়া ৪.৩০ বজাৰ পৰা ৫ বজাৰ ভিতৰত জেটিৰ দিশৰ পৰা সাগৰৰ সমীপত উপস্থিত হয় তেওঁলোক। জেটিত উপস্থিত থকা লাইফগাৰ্ডে নিয়ম অনুসৰি হুইচেল মাৰি তেওঁলোকক উভতি যাবলৈ কয়। কিন্তু নিষেধাজ্ঞাক আওকাণ কৰি পাঁচোটা কিশোৰে জেটিত লুকাই পানীত নামি পৰে। সেই সময়ত আৰব সাগৰ উত্তাল হৈ আছিল। কিছু মুহূৰ্তৰ ভিতৰতে পাঁচোটা কিশোৰকে পানীয়ে উটুৱাই লৈ যায়। সেই কথা উপলব্ধি কৰি ‘লাইফগাৰ্ড’জন দৌৰি যায়। কিন্তু তেতিয়ালৈ তেওঁলোক বহু দূৰ গুচি গৈছিল।

জানিব পৰা মতে, অগ্নিনিৰ্বাপক বাহিনী, মুম্বাই আৰক্ষীৰ বিশেষ বাহিনী, বিএমচিৰ দুৰ্যোগ সঁহাৰি দলৰ লোক উপস্থিত হৈ উদ্ধাৰ অভিযান আৰম্ভ কৰে। অৱশ্যে অনুসন্ধানৰ অন্তত এজন কিশোৰকহে উদ্ধাৰ কৰা সম্ভৱ হয়। জেটিৰ ৰছীত ধৰি নিজৰ জীৱন ৰক্ষা কৰে কিশোৰজনে। বাকীকেইজনৰ সন্ধান পোৱা নগʼল। পাঁচ ঘণ্টা ধৰি অবিৰত অনুসন্ধানৰ অন্তত উদ্ধাৰ অভিযানৰ অন্ত পৰাৰ কথা ঘোষণা কৰা হয়।

খবৰ অনুসৰি, নিৰুদ্দেশ হোৱা কিশোৰকেইটাৰ ঘৰ ছান্টা ক্ৰুজ ইষ্টৰ ভাকোলাৰ দত্ত মন্দিৰ অঞ্চলত।আৰক্ষীৰ সূত্ৰ অনুসৰি, সোমবাৰে মুঠ ৮ জন কিশোৰে সাগৰৰ পাৰত পিকনিকলৈ গৈছিল। পাঁচজনে সাগৰত গা ধুব যায়। তাৰ পিছতেই এই অঘটন সংঘটিত হয়।