এছিয়া কাপ (Asia Cup) হওক বা এদিনীয়া বিশ্বকাপ (ODI World Cup), মোবাইলত হট ষ্টাৰ এপ (Hot Star App) থাকিলে সকলো বিনামূলীয়াকৈ চাব পাৰিব (Can watch for free)। মুকেশ আম্বানীৰ জিঅ’ চিনেমাৰ প্ৰত্ত্যুত্তৰ দিবলৈ হট ষ্টাৰৰ এই ব্যৱস্থা বুলি অনুমান কৰা হৈছে।
জিঅ’ চিনেমাৰ গ্ৰাহকসকলে যোৱা বছৰ ফুটবল বিশ্বকাপ চাবলৈ একো খৰচ কৰিবলগীয়া হোৱা নাছিল। মোবাইলত খেল বিনামূলীয়াকৈ চাবলৈ পাইছিল। আইপিএলৰ সময়তো একেই ব্যৱস্থা কৰা হয়। ভাৰতৰ বিপুল বজাৰত জিঅʼৰ সৈতে প্ৰতিদ্বন্দ্বিতা কৰিবলৈ এইবাৰ ষ্টাৰে বিনামূলীয়াকৈ এছিয়া কাপ আৰু ক্ৰিকেট বিশ্বকাপ দেখুৱাবলৈ গৈ আছে।
হট ষ্টাৰৰ মুৰব্বী চাজিত শিৱানন্দনে কয়, “অʼটিটিৰ জৰিয়তে হট ষ্টাৰ হৈছে এটা প্ৰিমিয়াৰ এপ। আমি দৰ্শকসকলক বিভিন্ন অভিজ্ঞতা প্ৰদান কৰিছো। এইবাৰ আমি এছিয়া কাপ আৰু এদিনীয়া বিশ্বকাপ ক্ৰিকেট বিনামূলীয়াকৈ দেখুৱাবলৈ ওলাইছো। ইয়াৰ দ্বাৰা আমি অধিক লোকৰ কাষ চাপিব পাৰিম।”
উল্লেখযোগ্য যে জিঅ’ চিনেমাত বৃহৎসংখ্যক লোকে বিনামূলীয়াকৈ চাইছিল আইপিএলৰ খেল। এই প্ৰতিযোগিতাৰ বাবে জিঅʼৰ হাতত আছিল মোবাইল সম্প্ৰচাৰৰ অধিকাৰ। টিভিৰ অধিকাৰ ষ্টাৰে ক্ৰয় কৰাৰ পিছতো মোবাইল অধিকাৰ ক্ৰয়ৰ যুঁজত জিঅʼৰ হাতত পৰাস্ত হʼবলগীয়া হৈছিল। কিন্তু আইচিচি প্ৰতিযোগিতাত ষ্টাৰৰ দুয়োটা অধিকাৰ আছে।
কিন্তু বহুতে হট ষ্টাৰ ছাবস্ক্ৰাইব কৰা নাই। খেল চাবলৈ তেওঁলোকে জিঅʼক বেছি পছন্দ কৰে। বিশ্বকাপ সন্মুখত থকাৰ সময়তে ষ্টাৰে জিঅʼই মানুহক নিজৰ ওচৰলৈ ঘূৰাই আনিবলৈ ব্যৱহাৰ কৰা একেটা অস্ত্ৰ ব্যৱহাৰ কৰিবলৈ ওলাইছে। জিঅ’ চিনেমাত খেল চাবলৈ বিনামূলীয়া হʼলেও আন বহু অনুষ্ঠান চাবলৈ টকা খৰচ হয়। হট ষ্টাৰেও একেদৰেই আগবাঢ়িব বিচাৰে।
