ASSAM TIMES POST
নতুন দিল্লীঃ দেশজুৰি পিঁয়াজৰ আকাশলংঘী মুল্যবৃদ্ধিয়ে ত্ৰাহি মধুসূধন দেখুৱাইছে সাধাৰণ জনতাক। ইয়াৰ বিৰোধিতাৰে দেশৰ প্ৰান্ত-প্ৰান্তে অভিনৱ প্ৰতিবাদ সাব্যস্ত কৰিছে বিৰোধী দলসমূহে। দৰাচলতে ভাৰতীয় জনতা পাৰ্টি নেতৃত্বাধীন কেন্দ্ৰীয় চৰকাৰখনক যেন এজাউৰি দিবলৈ পিঁয়াজৰ মূল্যবৃদ্ধিয়ে বিৰোধী শিৱিৰসমূহক এটা সুযোগ প্ৰদান কৰিছে। এই সুযোগ বিৰোধীয়ে পুৰামাত্ৰাই গ্ৰহণো কৰিছে। বিজেপিশাসিত ৰাজ্য উত্তৰ প্ৰদেশৰ বিৰোধী যেন এখোপ চৰা। গেৰুৱা দলৰ চৰকাৰখনক পিঁয়াজৰ মূল্যবৃদ্ধিৰ অচিলাৰে শ’লঠেকত পেলাবলৈ সমাজবাদী পাৰ্টিয়ে লৈছে অভিনৱ পন্থা। সমাজবাদী পাৰ্টিৰ কৰ্মীসকলে বাৰানসীত স্থাপন কৰিছে এখন বিশেষ দোকান। দোকানখনৰ আগফালে লিখি থোৱা হৈছে ‘ইয়াত লোনত পিঁয়াজ ক্ৰয় কৰক’। দোকানখনৰ সন্মুখত গ্ৰাহকে আধাৰ কাৰ্ড বা ৰূপৰ আ-অলংকাৰ মৰ্টগেজ দি পিঁয়াজ কিনিব পাৰিব বুলিও প্ৰচাৰ চলাইছে সমাজবাদীৰ কৰ্মীসকলে। ইয়াৰোপৰি চহৰখনৰ আন এটা প্ৰান্তত মহঙা পিঁয়াজক লকাৰৰ ভিতৰত ৰাখিও ইয়াৰ মূল্যবৃদ্ধিৰ প্ৰতিবাদ কৰিছে কৰ্মীসকলে।
