দিল্লীৰ যন্তৰ-মন্তৰত বুধবাৰে মাজনিশা প্ৰতিবাদকাৰী মল্লযুঁজাৰুৰ সৈতে সংঘৰ্ষ আৰু কাজিয়াত লিপ্ত হয় দিল্লী আৰক্ষী। মল্লযুঁজাৰুসকলে দাবী কৰে যে মদ্যপান কৰা আৰক্ষীয়ে তেওঁলোকৰ লগত অসৎ আচৰণ কৰে আৰু মহিলা মল্লযুঁজাৰুৰ ওপৰত নিৰ্যাতন চলায়। তেওঁলোকৰ দাবী যে দুজন প্ৰতিবাদকাৰী আহত হৈছে। এজন ব্যক্তি চিকিৎসালয়ত ভৰ্তি হʼবলগীয়া হৈছে।
বিনেশে সংবাদ মাধ্যমৰ আগত কয়, “গোটেই দিন বৰষুণৰ বাবে মাটি তিতি থকাৰ বাবে আমি প্ৰতিবাদস্থলীত বিছনা মেলিবলৈ চেষ্টা কৰি আছিলো। তেতিয়াই আৰক্ষীয়ে আমাক আক্ৰমণ কৰে। তাত এগৰাকীও মহিলা আৰক্ষী বিষয়া নাছিল। সেই সময়তে গতিয়াই দিয়াৰ বাবে কিছুমানে মূৰত আঘাতো পাইছিল।” ইয়াৰ পিছতে বিনেশৰ চকুলো ওলাই আহে। তেওঁ কয়, “আমি কলংকিত অপৰাধী নহয় যে আৰক্ষীয়ে আমাৰ লগত এনে ব্যৱহাৰ কৰিব। এই দিনটো চাবলৈ দেশৰ বাবে আমি ইমান পদক লাভ কৰিলোঁ নেকি?”
উল্লেখযোগ্য যে বিশ্ব চেম্পিয়নশ্বিপত চাৰিটাকৈ পদক লাভ কৰা মল্লযুঁজাৰু বজৰং পুনিয়াই কয়, “ইমান অসন্মানিত হোৱাৰ পিছত মই এই পদকবোৰ কি কৰিম? মোৰ সকলো পদক ঘূৰাই লʼবলৈ চৰকাৰক অনুৰোধ কৰিম।”
বুধবাৰে এই ঘটনাত আপ নেতা সোমনাথ ভাৰতীকে ধৰি তিনিজন লোকক গ্ৰেপ্তাৰ কৰা হৈছে। তেওঁলোকৰ বিৰুদ্ধে অভিযোগ উত্থাপন হৈছিল যে তেওঁলোকে অনুমতি অবিহনে প্ৰতিবাদস্থলীত প্ৰৱেশ কৰিবলৈ চেষ্টা কৰিছিল।
