কাৰবি আংলং (Karbi Anglong) জিলাৰ অসম-নাগালেণ্ড সীমান্তত নিতৌ ন-ন স্থানত আৰক্ষীয়ে উদ্ধাৰ কৰিছে কৌটি কৌটি টকাৰ মূল্যৰ বুজন পৰিমানৰ মাৰাত্মক ড্ৰাগছ (Drug) ৷
যোৱা ২০ ফেব্ৰুৱাৰীত অসম-নাগালেণ্ড সীমান্তৰ খটখটীত (Khatkhati) গুৱাহাটীৰ পৰা অনা স্নিফাৰ ডগৰ সহায়ত প্ৰায় ২৪ কোটি মূল্যৰ নিষিদ্ধ ড্ৰাগছ উদ্ধাৰ কৰাৰ পিছত ২৫ ফেব্ৰুৱাৰীত ডিলাই আৰক্ষীৰ অভিযানত উদ্ধাৰ হৈছিল প্ৰায় ৮ কোটি টকা মূল্যৰ ড্ৰাগছ ৷
তাৰ পিছতে আজি বিয়লি পুণৰ বোকাজানত এক গোপন খবৰৰ ভিত্তিত বোকাজান চি আৰপিএফ কেম্পৰ ওচৰত নাকা বহাই এখন বাছৰ পৰা বেগসহ নামি অহা এজন লোকক তালাচী চলাই লোকজনৰ কৱলৰ পৰা অভিযানকাৰী দলটোৱে প্ৰায় পাঁচ কেজি মূল্যৰ সন্দেহযুক্ত ব্ৰাউন চুগাৰ (Brown Sugar) জব্দ কৰিবলৈ সক্ষম হয় ৷
সততে নাগালেণ্ড, মণিপুৰৰ পৰা সৰবৰাহ কৰা ড্ৰাগছ এইবাৰ বিহাৰৰ পৰা অহা সৰবৰাহকাৰীৰ পৰা উদ্ধাৰ কৰা হৈছে ব্ৰাউন চুগাৰখিনি৷ বোকাজানৰ চি ২০ চি আৰপি এফ, এপিআৰজি কেম্প বোকাজান আৰু বোকাজান থানা ষ্টাফৰ তৎপৰতাত উদ্ধাৰ হৈছে যুৱ সমাজক কুঙা কৰি পেলোৱা বৃহৎ পৰিমানৰ নিষিদ্ধ ড্ৰাগছখিনি৷
আটাইতকৈ উদ্বেগজনক কথা এই যে কাৰবি আংলং জিলাৰ অসম-নাগালেণ্ড সীমান্তৰ নিতৌ ন ন স্থানৰ পৰা সৰবৰাহকাৰীয়ে ন ন কৌশল প্ৰয়োগ কৰি বহিঃ ৰাজ্যলৈ নিচাযুক্ত ড্ৰাগছ সৰবৰাহৰ বাবে সৰবৰাহকাৰীয়ে অপচেষ্টা অব্যাহত ৰাখিছে ৷ কাৰবি আংলং আৰক্ষীয়েও এনে ড্ৰাগছৰ বিৰুদ্ধে সীমান্তত কঠোৰ অভিযান চলাই সৰবৰাহকাৰীৰ প্ৰতিটো অভিযান ব্যৰ্থ কৰি অহা পৰিলক্ষিত হৈছে ৷
সাংবাদিকৰ সৈতে হোৱা বাৰ্তালাপত কাৰবি আংলং জিলা আৰক্ষী অধীক্ষক সঞ্জীৱ কুমাৰ শইকীয়া (Sanjeev Kumar Saikia, S.P)ই কয় যে, আজি উদ্ধাৰ হোৱা ব্ৰাউন চুগাৰখিনি বিহাৰৰ পৰা অনা হৈছিল৷ নাগালেণ্ডৰ নিৰ্বাচনৰ বাবে কটকটীয়া নিৰাপত্তা ব্যৱস্থা থকাৰ বাবে এইবাৰ সৰবৰাহকাৰীয়ে ড্ৰাগছখিনি বিহাৰৰ পৰা আনিছে বুলি মন্তব্য কৰে ৷
আনহাতে ম্যানমাৰৰ লগতে মণিপুৰ ড্ৰাগছৰ সৰবৰাহ হোৱাৰ লগতে কাৰবি আংলং জিলাৰ অসম-নাগালেণ্ড সীমান্তত ট্ৰেনজিট পইণ্ট হোৱাৰ বাবে ইয়াত ড্ৰাগছ সৰবৰাহকাৰীৰ সমাগম হয়৷ যদিও আৰক্ষীয়ে সৰবৰাহকাৰীৰ সকলো চেষ্টা ব্যৰ্থ কৰিবলৈ সক্ষম হৈছে ৷
ইয়াৰোপৰি আজি উদ্ধাৰ হোৱা ব্ৰাউন চুগাৰখিনি আফগানিস্থান বা নেপালৰ পৰা সৰবৰাহ কৰা হব পাৰে বুলি সন্দেহ প্ৰকাশ কৰিছে আৰক্ষী অধীক্ষক গৰাকীয়ে ৷ আজি উদ্ধাৰ হোৱা ব্ৰাউন চুগাৰখিনি সৰবৰাহৰ সৈতে জড়িত বিহাৰৰ ছিৱান জিলাৰ কাগজী মহল্লাৰ লেফটেনেন্ট ৰাম সুভাকৰ পুত্ৰ সুনিল কুমাৰ (৫৫) বুলি চিনাক্ত কৰা হৈছে ৷ জব্দ হোৱা ব্ৰাউন চুগাৰখিনিৰ আন্তৰ্জাতিক বজাৰ মূল্য প্ৰায় ১৫ কোটি টকা হব বুলি সন্দেহ প্ৰকাশ কৰিছে আৰক্ষীয়ে৷
