কাৰ্বি আংলং(Karbi Anglong) জিলাৰ অন্যতম বিৰোধী আঞ্চলিক ৰাজনৈতিক দল অল’ পাৰ্টী হিলচ লিডাৰ কনফেৰেন্সছ চমুকৈ এপিএইছএলচি দলে আজি কাৰ্বি পৰিষদৰ পাঁচ নং ৰংখাং সমষ্টিৰ অধীনস্থ সাত গাঁওত এখন গণ সমাবেশ অনুষ্ঠিত কৰে ৷
শান্তিপূৰ্ণ ভাৱে অনুষ্ঠিত হোৱা গণ সমাবেশৰ কিছু সময়ৰ পাচতেই পশ্চিম কাৰ্বি আংলং জিলা প্ৰশাসন আৰু আৰক্ষীয়ে বাধা প্ৰদান কৰাৰ পাচতেই পৰিৱেশ উত্তপ্ত হৈ পৰে ৷
ইপিনে, জিলা খনৰ বিৰোধী আঞ্চলিক ৰাজনৈতিক দলটোৱে তিনিও পাৰ্বত্য জিলা ক্ৰমেঃ পশ্চিম কাৰ্বি আংলং, কাৰ্বি আংলং আৰু ডিমা হাচাও এই তিনি জিলাক সামৰি ভাৰত সংবিধানৰ অনুচ্ছেদ ২৪৪(ক) ধাৰাৰ অধীনত অসমৰ ভিতৰতে এখন সুকীয়া ৰাজ্য গঠনৰ দাবী উত্থাপন কৰি অহাৰ সমান্তৰালকৈ কাৰ্বি আংলং স্বাযত্ব পৰিষদৰ সংবিধান অনুযায়ী জনগোষ্ঠীটোৱে পাবলগা প্ৰাপ্যৰ দাবীত দীৰ্ঘদিন ধৰি এক গণ সংগ্ৰাম কৰি আহিছিল ৷
সেই মৰ্মে দলটোৱে কাৰ্বি আংলং জিলাৰ প্ৰত্যকটো পৰিষদীয় সমষ্টিত দীৰ্ঘদিনীয়া সংগ্ৰামৰ জনমত গঢ়াৰ লক্ষ্যৰে সমষ্টি ভীতিত এক গণ সমাবেশৰ কাৰ্যসুচী হাতত লৈছে ৷ দলটোৰ ধাৰাবাহিক কাৰ্যসুচী অনুযায়ী প্ৰায় দুই শতাধিক দলীয় সমৰ্থক লৈ গণ সমাবেশৰ কাৰ্যসুচী চলাই নিওঁতেই প্ৰথমে আৰক্ষীৰ সৈতে তৰ্ক-বিতৰ্কৰ সূত্ৰপাত ঘটে ৷ পিচে আৰক্ষীয়ে লাঠি চালনা কৰিবলৈ বাধ্য হ’য় ৷ লাঠি চালনাৰ মাজতেই আৰক্ষীয়ে সাত জনকৈ দলীয় সমৰ্থকক আটক কৰে ৷
