সমগ্ৰ ৰাজ্যৰ লগতে কাৰবি আংলং (Karbi Anglong) জিলাতো আজিৰে পৰা পথ সুৰক্ষা সপ্তাহৰ (Road Safety Week) কাৰ্যসূচীৰ শুভাৰম্ভ কৰা হয়৷ কাৰবি আংলং জিলা পৰিবহন বিষয়াৰ উদ্যোগত আৰু জিলা পৰিবহন সন্থাসমূহৰ সহযোগত ডিফুৰ বেচৰকাৰী বাছ আস্থানত আজি পুৱা ১০ বজাত এই উপলক্ষে এখন সভা অনুষ্ঠিত হৈ যায় ৷
কাৰবি আংলং জিলা উপায়ুক্ত মধুমিতা ভাগৱতী আৰু জিলা আৰক্ষী অধীক্ষক সঞ্জীৱ কুমাৰ শইকীয়া উপস্থিত থকা সভাখনৰ আঁত ধৰে জিলা পৰিবহন বিষয়া বিক্ৰমাদিত্য গগৈয়ে ৷ জিলাখনত পথ সুৰক্ষা সপ্তাহ কাৰ্যসূচীৰ শুভাৰম্ভ কৰি জিলা উপায়ুক্ত ভাগৱতীয়ে কয়যে– এই উপলক্ষে আমি মাহযোৰা কাৰ্যসূচী গ্ৰহণ কৰিছো ৷কেৱল এই সপ্তাহটো আমি উদযাপন কৰিলেই নহ’ব ইয়াক বাস্তৱ ক্ষেত্ৰতো মানি চলিব লাগিব ৷ সকলো সষ্টম হোৱাটোহে আচল কথা ৷ আমি সংকল্পৱদ্ধ হব লাগিব যাতে আগন্তুক বৰ্ষটোত আমাৰ জিলাখনত এটাও পথ দুৰ্ঘটনা সংঘটিত নহয় ৷ আৰক্ষী অধীক্ষক সঞ্জীৱ কুমাৰ শইকীয়াই ভাষণ প্ৰদান কৰি কয়যে–ভাৰতত বিভিন্ন কাৰণতকৈ পথ দুৰ্ঘটনাত সৰ্বাধিক লোকৰ মৃত্যু ঘটে ৷ এই বিষয়টোত সেয়ে চৰকাৰে প্ৰাধান্যতাৰে লৈ ইয়াক ৰোধ কৰাৰ ক্ষেত্ৰত বিভিন্ন কাৰ্যসূচী গ্ৰহন কৰিছে ৷
২০২১ বৰ্ষত কাৰবি আংলং জিলাত ৯৭ গৰাকী লোকৰ পথ দুৰ্ঘটনাত মৃত্যু ঘটাৰ বিপৰীতে ২০২২ বৰ্ষত এই সংখ্যা হ্ৰাস পাই ৫৭ গৰাকী হোৱা বুলি তেওঁ উল্লেখ কৰি ইয়াক এক সফলতা আখ্যা দিয়ে ৷ আনহাতে পথ দুৰ্ঘটনাৰ কাৰণে তিনিটা কাৰণক মুখ্য কাৰণ বুলি অভিহিত কৰে আৰক্ষী অধীক্ষক গৰাকীয়ে ৷ কাৰণ তিনিটা ক্ৰমে,মদ খাই গাড়ী চলোৱা, তীব্ৰ গতিত বাহন চলোৱা, গাড়ী ভালকৈ চলাব নজনাৰ লগতে একেটা পথেৰে বিপৰীত দিশৰ পৰা গাড়ী অহাও দুৰ্ঘটনাৰ এটা অন্যতম কাৰণ বুলি কয় আৰক্ষী অধীক্ষক গৰাকীয়ে ৷’
এই কাৰণবোৰ নিয়ন্ত্ৰণ কৰিব পাৰিলে দুৰ্ঘটনা প্ৰতিৰোধ কৰাৰ ক্ষেত্ৰত সফলতা লাভ কৰিব পৰা হব বুলিও তেও আশা প্ৰকাশ কৰে ৷ এইক্ষেত্ৰত সকলোকে সংকল্পৱদ্ধ হবলৈ তেওঁ আহ্বান জনায় ৷ পথ সুৰক্ষাৰ ক্ষেত্ৰত পৰিবহন বিভাগে তেওঁলোকৰ দায়িত্ব, আৰক্ষীয়ে আৰক্ষীৰ দায়িত্ব আৰু সাংবাদিকে সজাগতাৰ সৃষ্টিৰে নিজৰ দায়িত্ব পালন কৰিব বুলিও তেওঁ আশা ব্যক্ত কৰে ৷
জিলা পৰিবহন বিষয়া বিক্ৰমাদিত্য গগৈয়ে কয়যে ৰাজ্য চৰকাৰ, কেন্দ্ৰীয় চৰকাৰৰ নিৰ্দেশ মৰ্মে,আমি এই কাৰ্যসূচী গ্ৰহণ কৰিছো ৷ আৰু সমগ্ৰ জিলা জুৰি এনে কাৰ্যসূচী গ্ৰহণ কৰা হব ৷ আনহাতে ১৭ জানুৱাৰীত মাঞ্জাৰ মহংদিজুৱাৰ পৰা কাছা খেল পথাৰলৈ প্ৰাইজমনি হাফ মাৰাথান প্ৰতিযোগিতাৰে পথ সুৰক্ষা সপ্তাহ ২০২৩ৰ সামৰণি পৰিব বুলি পৰিবহন বিষয়া গৰাকীয়ে জানিবলৈ দিয়ে ৷
আনহাতে, আজিৰ এই শুভাৰম্ভনি কীৰ্যসূচীৰ সৈতে জিলা পৰিবহন বিভাগে বাণিজ্যিক বাহন চালক আৰু পৰিচালক সকলৰ বাবে বিনামূলীয়া এক চকু পৰীক্ষা কাৰ্যসূচীও অনুষ্ঠিত কৰে ৷ জিলা পৰিবহন বিষয়াই জানিবলৈ দিয়ে যে, এই পৰীক্ষা সম্পূৰ্ণ বিনামূলীয়া হ’ব আৰু ইয়াত অংশ গ্ৰহণ কৰা চালক- পৰিচালক সকল গুৰুতৰ ৰূপে আক্ৰান্ত হ’লে তেওঁলোকৰ চিকিৎসাৰ ব্যৱস্থাও বিভাগে কৰিব বুলিও প্ৰকাশ কৰে ৷ আজিৰ এই অনুষ্ঠানত জ্যেষ্ঠ সাংবাদিক সঞ্জু বৰা, কিৰি ৰংহাঙ আৰু জ্যেষ্ট নাগৰিক অশোক ঠাকুৰেও চালক সকলক গ্ৰহণ কৰিবলগীয়া সুৰক্ষা ব্যৱস্থা সম্পৰ্কে ভাষণ প্ৰদান কৰে৷
