ASSAM TIMES POST
ৰঙাপৰাঃ সমগ্র ৰাজ্যতে সুধাকন্ঠ ড০ ভূপেন হাজৰিকাৰ ৮তম মুত্যু তিথি পালন কৰাৰ সমান্তৰালকৈ ৰঙাপৰাতো বিভিন্ন দল সংগঠনে গভীৰ শ্রদ্ধাৰে মহান শিল্পীগৰাকীৰ প্ৰতি শ্রদ্ধাজ্ঞলি আৰু বিভিন্ন সাংস্কৃতিক অনুষ্ঠান অনুষ্ঠিত কৰে। পুৱাৰে পৰা আৰম্ভ হোৱা ৰঙাপৰা আঞ্চলিক ছাত্ৰ সন্থাৰ উদ্যোগত বৰ্ণাঢ্য আৰু দিনজোৰা কায্যসূচীৰে অনুষ্ঠান অনুষ্ঠিত হয়।
পুৱা ছাত্ৰ সন্থাৰ পতকা উওোলন কৰে ছাত্ৰ সন্থাৰ আঞ্চলিক সভাপতি বাপন দাস বড়োৱে। লগতে ভূপেন হাজৰিকাৰ প্রতিচ্ছবিত মাল্যৰ্পন কৰে ৰঙাপৰা উচ্চতৰ মাধ্যমিক বিদ্যালয়ৰ অধ্যক্ষ মোহন গোশ্বামীয়ে। দিনৰ ভাগত অঞ্চলটোৰ বিভিন্ন বিদ্যালয়ৰ ছাত্ৰ-ছাত্ৰীৰ মাজত কুইজ প্রতিযোগিতা অনুষ্ঠিত কৰে কুইজ মাষ্টাৰ অসীম ডেকাই। পুতুল নাথ আৰু চিত্ৰাংকণ প্রতিযোগিতাৰ বিচাৰকৰ ভুমিকা পালন কৰে চিত্ৰ শিল্পী পাৰশ ৰাম আৰু কনক বৰুৱাই। বিয়লি বন্তি প্রজ্বলনৰ উদ্বোধন কৰে সাংবাদিক শশী শৰ্মাই আৰু সাংস্কৃতিক সন্ধিয়া মুকলি কৰে প্রাক্তন ছাত্ৰ নেতা বিৰোজ শইকীয়াই।
আনহাতে ভূপেন হাজৰিকাৰ জীৱনৰ ওপৰত আলোকপাত কৰে বিশিষ্ট কবি ও কৃতি শিক্ষক ভবেশ মিশ্রই। নিশা বিজয়ী ছাত্ৰ-ছাত্ৰী সকলৰ মাজত বঁটা বিতৰনীৰ লগতে গুৱাহাটীৰ আমন্তিত অতিথি শিল্পী কাব্যশ্রী শইকীয়াৰ গীত-মাতে উপস্থিত সকলোকে আপ্লুত কৰে। ইপিনে আজি পুৱা সাহিত্য সভা চৌহদত ৰঙাপৰা আঞ্চলিক সাহিত্য সভাই শিল্পী গৰাকীৰ শ্রদ্ধাজ্ঞলি অনুষ্ঠানত সাহিত্য সভাৰ সম্পাদক ৰূপক শৰ্মা জাতীয় ঐক্য মঞ্চৰ সভাপতি ৰাজেন কটকী সম্পাদক আব্দুল ৰহিম ৰঙাপৰা উচ্চতৰ মাধ্যমিক বিদ্যালয়ৰ উপাধ্যক্ষ অতুল চক্ৰৱৰ্তী, নিপেন ডেকা আদি ব্যাক্তি সকলে শিল্পি গৰাকীৰ প্রতিচ্ছবিত মাল্যৰ্পন কৰাৰ লগতে তেওঁৰ জীৱন দৰ্শনৰ ওপৰত আলোকপাত কৰে।
