ASSAM TIMES POST
নগাঁওঃ নগাঁও চহৰত বৃদ্ধি পাব ধৰিছে চুৰি কাণ্ডকে ধৰি বিভিন্ন অসামজিক কাৰ্যকলাপ। আৰক্ষীৰ স্হিতিক ভেঙুচালি কৰি দিনদিয়েক পূৰ্বে নগাঁও সদৰ থানাৰ মূল প্ৰৱেশদ্বাৰৰ সম্মুখতে থকা এছ বি আইৰ এটা এ.টি.এম চোৰে লণ্ডভণ্ড কৰাৰ পিছত পুনৰ যোৱা নিশা চোৰে তাণ্ডৱ চলালে নগাঁৱৰ পলিটেকনিক ছাত্রাবাসত।
আজি পুৱতি নিশা প্ৰায় ৪ বজাত পলিটেকনিকৰ ছাত্রাবাসত চোৰে এটা কোঠাৰ দুৱাৰৰ গ্লাছ ভাঙি কেইবাটাও ম’বাইল, লেপটপৰ লগতে আৱশ্যকীয় বহু সামগ্ৰী লৈ যায়। পলিটেকনিক ছাত্রাবাস সমূহত সুৰক্ষা কৰ্মীৰ লগতে চি.চি.টিভিৰ ব্যৱস্থা নথকাৰ বাবে চোৰে অনায়াসে চুৰি কাৰ্য সংঘটিত কৰি যোৱা বুলি ছাত্রাবাসৰ ছাত্রসকলে অভিযোগ উত্থাপন কৰে। উল্লেখ্য, ছাত্রাবাস সমূহত সুৰক্ষা ব্যৱস্থাৰ লগতে চি.চি.টিভিৰ ব্যৱস্থা কৰিব লাগে বুলি কাৰিকৰী শিক্ষা প্রতিষ্ঠানখনৰ কৰ্তৃপক্ষক বাৰম্বাৰ ছাত্রসকলে দাবী জনাই আহিছে যদিও এই ক্ষেত্ৰত কোনো ধৰণৰ ব্যৱস্থা গ্ৰহণ কৰা হোৱা নাই।
আনহাতে পলিটেকনিকৰ ছাত্রাবাস সমূহত পূৰ্বেও কেইবাবাৰো চোৰে লুটপাত চলোৱাৰ অভিযোগ উত্থাপন হৈছে। ইপিনে নগাঁও চহৰত সঘনাই সংঘটিত হৈ থকা চিলনী চোৰকে ধৰি বিভিন্ন চুৰি আৰু অসমাজিক কাৰ্যকলাপৰ ঘটনাই সাধাৰণ জনতাক শংকিত কৰি তুলিছে। চহৰখনত সংঘটিত হৈ থকা এনেবোৰ অসামাজিক ঘটনাই নগাঁও আৰক্ষীৰ ব্যৰ্থতাক উদঙাই দিয়া বুলিও স্হানীয় ৰাইজে মত প্ৰকাশ কৰিছে।
