ASSAM TIMES POST
নগাঁওঃ দেশত নতুন যান-বাহন আইন প্ৰৱৰ্তনৰ পিছতে সমগ্ৰ ৰাজ্যৰ লগতে নগাঁও জিলা পৰিবহণ বিষয়াৰ কাৰ্যালয়ো তৎপৰ হৈ পৰিছে৷ বিশেষকৈ নতুন যান বাহন আইন কাৰ্যকৰী কৰাত জিলা পৰিবহণ বিভাগে বিশেষ পদক্ষেপ গ্রহণ কৰাৰ সমান্তৰালকৈ আইনখন সম্পৰ্কে নগাঁৱৰ জনসাধাৰণৰ মাজতো বিশেষ তৎপৰতা পৰিলক্ষিত হৈছে৷
নতুন আইন খন বলবৎ হোৱাৰ দিনাৰ পৰা আজি পৰ্যন্ত ‘প’লুচন লেট ফাইন’ শিতানত নগাঁৱৰ পৰিবহণ বিভাগত ১ কোটি ৩ লাখ ৭৫ হেজাৰ টকা ৰাজহ সংগ্ৰহ হয় ৷ উল্লেখ্য, যোৱা ৩ অক্টোবৰৰ পৰা প্ৰদূষণ প্ৰমাণ পত্ৰৰ ম্যাদ উকলি যোৱা বাহনৰ গৰিকীয়ে ৫০০ টকা জৰিমনা আদায় দি প্ৰদূষণ কেন্দ্ৰ সমূহৰ পৰা প্ৰমাণ পত্ৰ সংগ্ৰহ কৰাৰ ক্ষেত্ৰত তৎপৰতা প্রদর্শন কৰাত কেন্দ্ৰ সমূহত যথেষ্ঠ ভিৰ পৰিলক্ষিত হয়।
পুৱাৰ পৰা যান বাহনৰ গৰিকীয়ে প্ৰদূষণ কেন্দ্ৰ সমূহত শাৰী পাতি প্ৰমাণ পত্ৰ সংগ্ৰহত ব্যস্ত হৈ পৰিছে । আনহাতে সময়ত প্ৰদূষণ মুক্ত প্ৰমাণ পত্ৰ সংগ্ৰহ নকৰা বহু যান বাহনৰ গৰাকীয়ে আনকি জিলা পৰিবহণ বিষয়া আৰু যান বাহন শাখাৰ আৰক্ষীৰ কঠোৰ স্থিতিৰ বাবে নিজৰ বাহন সমূহ ৰাজপথত চলাচলৰ কৰোৱাৰ পৰা বিৰত আছে।
