বিজেপি চৰকাৰৰ জন বিৰোধী নীতিক সমালোচনা মজদুৰ ইউনিয়নৰ নেতা ৰাখাল দাসগুপ্তৰ
ASSAM TIMES POST
নগাঁওঃ কেন্দ্ৰৰ বিজেপি চৰকাৰখনে ভাৰতীয় ৰেল সেৱাক ব্যক্তিগত খণ্ডলৈ নিব বিচৰাৰ প্ৰতিবাদত লামডিঙত উত্তাল প্ৰতিবাদ সাব্যস্ত কৰে উত্তৰ-পূৱ সীমান্ত ৰে’লৱেৰ লামডিং মাণ্ডলিক কাৰ্যালয়ৰ মজদুৰ ইউনিয়নে।
লামডিং স্থিত মাণ্ডলিক প্ৰৱন্ধকৰ কাৰ্যালয় ঘেৰাও কৰি মজদুৰ ইউনিয়নৰ কৰ্মী সকলে পৰিস্থিতি উত্তপ্ত কৰি তোলে।মজদুৰ ইউনিয়নৰ নেতা সকলে অভিযোগ কৰা মতে চৰকাৰে ৫০টা ৰে’লৱে ষ্টেচন আৰু ১৫০খন ৰে’লক ব্যক্তিগত খণ্ডলৈ নিব বিচাৰি ইতিমধ্যেই নিৰ্দেশ জাৰি কৰিছে।যিটো কোনো পধ্যেই গ্ৰহন যোগ্য নহয়। চৰকাৰৰ এই নীতি মানি নলয় বুলি সকীয়াই দিয়ে মজদুৰ ইউনিয়নে। আনফালে প্ৰতিবাদ কাৰ্য্যসূচীত অল ইণ্ডিয়া ৰে’লৱে মেনচ ফেডাৰেচনৰ সভাপতি ৰাখাল দাসগুপ্তই অংশ গ্ৰহন কৰে।
সভাপতিগৰাকীয়ে কয় যে কেন্দ্ৰৰ মোদী চৰকাৰে দেশত অলিখিত জৰুৰীকালীন (Emergency) শাসন চলাইছে। চৰকাৰৰ নীতিৰ বিৰুদ্ধে মাত মাতিলে ষড়যন্ত্ৰ কৰি মুখ বন্ধ কৰাৰ চেষ্টা কৰে৷ মজদুৰ ইউনিয়নৰ নেতা দাসগুপ্তই কয়, যি সময়ত দেশৰ অৰ্থনৈতিক অৱস্থা বেয়া হৈ পৰিছে তেনে সময়ত দেশৰ সম্পদ সমূহক চৰকাৰে ব্যক্তিগত কোম্পানীক বিক্ৰী কৰি লাভৱান হৈছে।
মজদুৰ ইউনিয়নৰ নেতাসকলে দাবী কৰে যে তেওঁলোকৰ এই প্ৰতিবাদৰ চিঞৰ সমগ্ৰ দেশে শুনিব। তেওঁলোকে চৰকাৰে অনতিপলমে যদি সম্পদ সমূহক বিক্ৰী কৰাৰ চক্ৰান্ত বন্ধ নকৰে তেনেহলে আগন্তুক দিনত ৰে’ল পথ অৱৰোধৰ লগতে জংগী আন্দোলন গঢ়ি তুলিব বুলিও সকীয়াই দিয়ে৷
উল্লেখ্য পৰিবৰ্তনৰ শ্লোগান দিয়া বিজেপি চৰকাৰে অসম তথা দেশৰ গুৰুত্বপূৰ্ণ বিভাগ সমূহ ব্যক্তিগত খণ্ডলৈ নিয়াৰ প্ৰচেষ্টা চলাইছে৷ অসমৰ তেল শোধানাগাৰো ব্যক্তিগত কোম্পানীসমূহৰ হাতত বিক্ৰী কৰিব বিচৰাৰ সময়তে পুনৰ ৰে’ল সেৱা ব্যক্তিগত খণ্ডলৈ নিব বিচৰা কাৰ্যই ৰে’ল বিভাগৰ কৰ্মচাৰী সকললৈ বিপদ কঢ়িয়াই আনিছে৷
