আজি ডিফু (Diphu) ন্যায়িক আদালতে (judicial court) ধৰ্ষণকাৰীৰ বিৰুদ্ধে এক ৰায়দান কৰি ধৰ্ষণকাৰী (Rapist)ক দহ বছৰৰ সশ্ৰম কাৰাদণ্ড (10 years in prison) বিহে ৷ ডিফু ন্যায়িক আদালতৰ সহকাৰী সত্ৰ ন্যায়াধীশ মিছবাহ-উল হাছান আনছাৰীয়ে মঙলবাৰে ঘোষণা কৰে উক্ত ঐতিহাসিক ৰায়দান ৷
ডিফু আদালতৰ অতিৰিক্ত লোক অধিবক্তা সঞ্জয় যাদৱে সংবাদ মাধ্যমৰ সৈতে হোৱা বাৰ্তালাপত ঘটনাৰ বিৱৰণী দি কয় যে, যোৱা ইংৰাজী ২০২১ চনৰ এপ্ৰিল মাহৰ ৩০ তাৰিখে বোকাজান থানা এলেকাৰ ২নং ডিলাউজানৰ বাসিন্দা চিআৰপি এফ ইলিয়া বান্দাই তেওঁৰ প্ৰতিবেশী ছোৱালী আৰু তাইৰ ভতিজাৰ লগতে নিজ শিশু কন্যাসহ গাড়ীৰে সৰুপথাৰত আত্মীয়ৰ ঘৰত আলহী খাবলৈ যায় ৷
তাৰ পৰা সন্ধিয়া উভতি আহোঁতে ১নং ডিলাউজানত ৰাস্তাৰ কাষত গাড়ী ৰখাই চালকক মাংস আনিবলৈ পঠিয়াই দিয়ে আৰু গাড়ীত উচ্চ স্বৰত মিউজিক চিষ্টেম বজাই বাহিৰত মদ্যপান কৰিবলৈ ধৰে ৷ সেই সময়ত ভুক্তভোগী ছোৱালীজনীৰ ঘৰৰ পৰা ফোন অহাত তাই বাহিৰত ওলাই ঘৰত ফোন কৰিবলৈ ধৰে ৷ অভিযুক্ত ইলিয়া বান্দাই ভুক্তভোগীক ফোন কৰাত বাধা প্ৰদান কৰি বলপূৰ্বক ভুক্তভোগীক ধৰ্ষণ কৰে ৷
পিছত অভিযুক্তই ভুক্তভোগী ধৰ্ষিতাক ঘৰত আনি দিয়ে ৷ ভোক্তভোগীয়ে লাজ আৰু অপমানত পৰিয়ালৰ লোকক একো নোকোৱাকৈ থাকে আৰু দুদিনমান পিছত ফেনাইল পান কৰে ৷ ভুক্তভোগীক বোকাজান সমুহীয়া চিকিৎসালয়ত চিকিৎসা প্ৰদান কৰি সুস্থ কৰি তোলাত ধৰ্ষিতাই ন্যায় বিচাৰে ৷ এইলৈ পৰিয়ালৰ লোকে বোকাজান থানাত এক এজাহাৰ দাখিল কৰে ৷
পিছলৈ উক্ত গোছৰ ডিফু সত্ৰ ন্যায়াধীশৰ আদালতলৈ বিচাৰ প্ৰক্ৰিয়াৰ বাবে হস্তান্তৰ হয় ৷ উক্ত গোছৰৰ এবছৰৰ পিছত অতি কম সময়ৰ ভিতৰত ডিফু ন্যায়িক আদালতৰ সহকাৰী সত্ৰ ন্যায়াধীশৰ আদালতে মঙলবাৰে উক্ত গোছৰৰ ৰায়দান কৰি অভিযুক্ত ইলিয়া বান্দাক দহ বছৰক সশ্ৰম কাৰাদণ্ডৰে দণ্ডিত কৰে আৰু দহ হাজাৰ টকাৰ জৰিমনা বিহে ৷ জৰিমনা অনাদায়ে অতিৰিক্ত দুমাহৰ কাৰাবস খাটিব লাগিব বুলি অতিৰিক্ত লোক অধিবক্তা সঞ্জয় যাদৱে জানিবলৈ দিছে ৷